2017 оны наймдугаар сарын сүүлчээр Францын нийслэл Парис хотноо болсон чөлөөт бөхийн дэлхийн аварга шалгаруулах тэмцээний эрэгтэйчүүдийн 57 кг-д 2015 оны Лас-Вегасын ДАШТ-ийн хүрэл медальт, Монгол Улсын гавьяат тамирчин Эрдэнэбатын Бэхбаяр дахин хүрэл медалийн эзэн болж дэлхийн хэмжээний бөх гэдгээ нотолсон билээ. Тэрбээр Парисаас хүрэл медаль хүртсэн амжилтаараа Монголын чөлөөт бөхийн тамирчдаас ДАШТ-ээс хоёр болон түүнээс дээш медаль хүртсэн 16 дахь, эрэгтэйчүүдээс 10 дахь бөхөөр тодорсон билээ.
Тэгвэл саяхан Ираны алдарт бөх Голам Реза Тахтийн нэрэмжит чөлөөт бөхийн Олон улсын тэмцээн Ираны Табриз хотноо амжилттай болж өндөрлөсөн. Алдарт бөх Голам Реза Тахтийн нэрэмжит тэмцээн 38 дахь удаагаа зохиогдоход дэлхийн 23 орны 180 гаруй бөх хүч бяраа үзэн өрсөлдсөн билээ. Бөхийн орон Иран алдарт бөхийнхөө нэрэмжит тэмцээнд ихээхэн ач холбогдол өгдөг бөгөөд эзэн орны бөхчүүд давуу эрхээр нэг жинд 2-3 бөх барилддаг бөгөөд алдарт аваргынхаа нэрэмжит тэмцээний алтан медалийг амь шигээ хайрлаж гадны бөхчүүдэд алдах тун дургүй гэдгээрээ хэзэнээс алдартай гэдэг. Энэ тэмцээнд Монгол Улсаа төлөөлөн дөрвөн бөх барилдсан бөгөөд хоёр алт, хоёр хүрэл медаль хүртэж, бүгд медальд хүрсэн сайхан амжилт үзүүлсэн юм.
Тэмцээний 57 кг-ын жинд барилдсан ДАШТ-ий хошой хүрэл медальт, МУГТ Э.Бэхбаяр 2017 оны залуучуудын ДАШТ-ий мөнгөн медальт Армен бөх Михран Жабуряныг 10:0, Ираны Хамид Халилыг 12:0, аваргын төлөө мөн Ираны Надер Хажиханийг 11:0-ээр ялан, тасархай түрүүлж дэлхийд ноёлох бөх болсноо бахархалтайгаар нотолсон юм. Чансаагаараа дэлхийд дээгүүр эрэмбэлэгддэг Тахтийн нэрэмжит тэмцээнд сүүлийн жилүүдэд жиндээ аваргалсан бөхчүүдээс өрсөлдөгчдөө ганц ч оноо алдалгүй босоо түрүүлсэн гэдгээрээ Монгол Улсын гавьяат тамирчин Э.Бэхбаярын энэ амжилтыг Ираны хэвлэлүүд онцлон бичиж байсныг тус тэмцээнд бөхчүүдээ авч явсан Монгол Улсын гавьяат дасгалжуулагч А.Цэдэнсодном бахархан дурсаж байсан нь тохиолдлын хэрэг биш юм.
Одоо Монгол Улсын гавьяат тамирчин Э.Бэхбаярт ДАШТ-ний алтан медаль болон олимпийн медаль л дутуу байна. Учир нь тэрээр 2015 оны тавдугаар сард Катарын Дохад болсон Азийн аварга шалгаруулах тэмцээнд дөрөв барилдахдаа бүх өрсөлдөгчөө илт давамгайлан ялж аваргын алтан медалийг энгэртээ зүүж байсан юм. Ирэх аравдугаар сарын сүүлчээр Унгарын Будапештэд болох ДАШТ-д түрүүлээрэй хэмээн Монгол Улсын гавьяат тамирчин Э.Бэхбаярынхаа дээлийн захыг мушгицгаая, бөхөд хайртай Монголчууд аа.
Д.Түвшин
Сэтгэгдэл (8)