Монгол Улсын Ерөнхийлөгч Х.Баттулга Улсын Ерөнхий прокурорын орлогчид М.Чинбат, С.Алиманцэцэг нарыг нэр дэвшүүлээд байгаа.

МАН-ын бүлэг Улсын Ерөнхий прокурорын орлогчид нэр дэвшсэн нэр бүхий прокурорыг дэмжихгүй гэсэн байр суурь илэрхийлж байсан.

Энэ ч утгаараа прокурор С.Алимцэцэгийг орлогч прокуророор томилохыг дэмжиж, М.Чинбатын оронд Сонгинохайрхан дүүргийн Ерөнхий прокурор Т.Эрдэнэбатын нэрийг оруулж ирсэн юм. Гэвч өчигдөр Ерөнхий сайдтай тохиролцоо хийсний үндсэн дээр Т.Эрдэнэбатыг Улсын Ерөнхий прокурорын газарт удирдах албан тушаалд томилж, С.Алимцэцэг, М.Чинбатыг Ерөнхий прокурорын орлогчид дэмжье гэсэн шийдэлд хүрсэн.

Үүнтэй холбогдуулан УИХ-ын гишүүн Б.Бат-Эрдэнээс зарим зүйлийг тодрууллаа.

-Улсын Ерөнхий прокурорын орлогчид нэр дэвшээд байсан М.Чинбатын оронд Сонгинохайрхан дүүргийн прокурор Т.Эрдэнэбатын нэрийг оруулж ирсэн. Гэвч М.Чинбатыг Ерөнхий прокурорын орлогчид дэмжье гэсэн шийдэлд хүрсэн байна лээ. Энэ талаар та сонсон уу?

-Бүлгийн хуралд суугаагүй болохоор ямар нэг мэдээлэл алга. Ерөнхийлөгчийн Тамгын газрын дарга З.Энхболд "Ерөнхий прокурорын хоёр орлогчийг танай бүлэг дээр танилцуулна" гэж хэлж байсан.

-Ерөнхийлөгчийн Тамгын газрын дарга З.Энхболд гишүүдийг дарамталсан гэх мэдээлэл гараад байна. Энэ үнэн юм болов уу?

-Намайг лав дарамталсан удаа байхгүй. Би ямар нэгэн бүлэг пракцид байдаггүй учраас надад юм хэлдэггүй байх.

-Таны хувьд Ерөнхий прокурорын туслахыг дэмжиж байгаа юу?

-Мэдэхгүй байна. Ерөнхий прокурорыг УИХ-ын чуулганаар томилох үед л сууж байсан юм. Тухайн үед орлогчид нэр дэвшиж байгаа хүмүүсийн танилцуулгаас нь харахад нэг нь хуучин гурван өрөө, угсармал байрандаа амьдардаг юм билээ. Энэ бол том үзүүлэлт гэж харж байгаа.

Төрийн алба хашиж байгаа хүн ийм жудагтай, зарчимтай байх ёстой. Тэгвэл их зүйлийн чиг гарна гэж боддог. Гэтэл УИХ-ын гишүүдээс эхлээд төрийн бүх шатанд ажиллаж байгаа хүмүүсийн ажилласан цаг хугацаа, цалин, нийгмийн хамгааллыг нь харьцуулаад үзэхэд үндэслэлгүй хөрөнгөжсөн хүмүүс их байна. Олон тэрбум төгрөгийн байр сууцанд суудаг, тэрбумын унаа машинтай байна. Энэ бол зөв жишиг биш.

-“Жаст”-ын Ш.Батхүүг Эрдэнэтийн 51 хувийг барьцаалсан дуулиан анх дэгдэж байхад түүний бүх хөрөнгийг төр битүүмжилж байсан. Өнөөдөр түүний зээлсэн 40 сая ам.долларыг төр төлж, буруутай этгээдээр буцаан төлүүлнэ гэж байна. Гэтэл түүний хөрөнгө байхгүй байгаад байна. Энэ хөрөнгө хайчсан юм бэ?

-Ард түмний хөрөнгөөр бусдын зээлсэн өрийг төлүүлэх нь байж болохгүй зүйл. Ш.Батхүүгээс 40 сая ам.долларыг буцааж төлүүлэх юм мэдэхгүй, бүү мэд. Хөрөнгөө хаашаа зувчуулсаныг нь ч мэдэхгүй. Үнэхээр төр хурааж авсан юм уу, эсвэл өөр хүний нэр дээр шилжүүлчихсэн юм уу гэдгийг тогтоох хэрэгтэй. Төр энэ луйварчдын толгойг илээд байж таарахгүй.

Б.Лхам