Хууль зүйн байнгын хорооны өчигдрийн хуралдааны үеэр С.Зоригийн амь насыг хохироосон хэрэгт буруутгагдан ял эдэлж буй  Б.Содномдаржаа, Т.Чимгээ нарыг суллах тухай асуудлыг УИХ-ын гишүүн Л.Болд гаргаж, улмаар тэдний эрхийг хамгаалах арга хэмжээ авахыг дэмжигдсэн юм. 

Уг асуудалтай холбогдуулан Хууль зүй, дотоод хэргийн сайд Ц.Нямдорж "Цагдаагийн байгуллагад эрүүдэн шүүсэн, гүйцэтгэх ажлын хууль зөрчсөн гэсэн хоёр хэрэг шалгагдаж байна. Хуулиараа прокурор шинэ нөхцөл байдлын дүгнэлт гэж бичдэг юм. Тэрийг нь бичих байх. Дараа нь Улсын Дээд шүүхээр орно. Шүүх дээр гурван асуудал хэлэлцэгдэх болов уу. Нэгдүгээрт, эрүүдэн шүүсэн асуудал. Хоёрдугаарт, Гүйцэтгэх ажлын тухай хууль зөрчсөн асуудал. Гуравдугаарт, Б.Содномдаржаа, Т.Чимгээ хоёрыг хэрхэх вэ гэдэг асуудал.  Б.Содномдаржаа, Т.Чимгээ нарыг суллах асуудлыг шүүхээр л шийднэ.  

Тэд хэлмэгдэж, хилсээр шийтгэгдсэн бол хохирол нөхөн төлнө. Харин захиалагчийн асуудлыг тагнуулын байгууллага шалгагдаж байгаа.

Б.Булганыг 10 сар хориод, сулласан. Яалт ч үгүй цорын ганц гэрч нь Б.Булган байсан. Одоо гэрч биш, хохирогч биш болчихсон. Хамгийн гол нь Б.Булганы хэлж зуруулсан гэх зургаар Б.Содномдаржаа нарыг шийтгэсэн. 

Ямар ч байсан эрүүдэн шүүсэн гэдэг бол тодорхой болсон. Өдрөөс өдөрт шинэ баримт гарч ирж байна. 

Эрүүдэн шүүсэн хэрэгт яг өнөөдрийн байдлаар гурван хүн хоригдож, шалгагдаж байна. Цаашдаа нэмэгдэх байх. Хариуцлагад татагдах хүмүүс нэмэгдэнэ" гэлээ. 

Г.Алимаа