УИХ-ын гишүүн О.Баасанхүү Эрүүгийн хуульд заасан хөөн хэлэлцэх хугацааны талаар сэтгүүлчдын сонирхсон асуултад хариулт өглөө.
-Хөөн хэлэлцэх хугацаа дууссан учир авлига, албан тушаалын зарим хэргийг хэрэгсэхгүй болж байна. Та үүнийг юу гэж харж байна вэ?
-Хөөн хэлэлцэх хугацааг гаднын бүх улсууд хуулиараа зохицуулсан байдаг. Ингэхдээ хуулийн байгууллага шалгахаас өмнөх үед хөөн хэлэлцэх хугацаа дууссан бол хэргийг хэрэгсэхгүй болгодог. Жишээлбэл, хөөн хэлэлцэх хугацаа таван жил байлаа гэхэд зургаа дахь жилд нь тухайн хэргийг илрүүлсэн бол “Хөөн хэлэлцэх хугацаа дууссан” учир гээд хэргийг хаадаг.
Харин манай улсад хүчин төгөлдөр мөрдөгдөж байгаа хуульд хэргийг шалгаж байгаа хугацаагаа хөөн хэлэлцэх хугацаанд оруулна гэж тусгасан. Шүүхийн шийдвэр гартал гэж бий шүү. Хуулиар цагдан хорьж шалгах хугацаа нь хоёр жил хүртэлх гэж бий. Бүрэлдэхүүнтэй хэрэг, дуулиантай хэргийг шалгахад маш их хугацаа ордог. Зарим хэргийн хувьд холбогдогчид нь гадагшаа зугтсан байдаг. Энэ үед хэргийг түтгэлзүүлээд цаашаа явдаг. Гэтэл хуулийн байгууллагын шалгаж байгаа хугацааг хөөн хэлэлцэх хугацаанд оруулна гэж тусгаснаараа асуудал үүсгэж байгаа юм. Жишээлбэл, 2014 онд үйлдсэн гэмт хэргийн шүүх хурал 2019 онд боллоо гэхэд хөөн хэлэлцэх хугацаа таван жил дууссан гэж хэргийг хааж байна.
-Ш.Раднаасэд гишүүн хугацаагүйгээр иргэдийг хорьдог, шалгадаг асуудал үүсдэг учир хөөн хэлэлцэх хугацааг ингэж зохицуулсан гэсэн. Үүнийг өөр хуулиар зохицуулах боломж бий юу?
-Монгол Улсын Үндсэн хууль болон Эрүү, Эрүүгийн хэрэг хянан шийдвэрлэх тухай хуульд тухайн хэргийг шалгаж байгаа хуулийн байгууллын үйл ажиллагаанд хөндлөнгөөс нөлөөлөхийг хориглоно гэж заасан. Удаан шалгаж байна уу, эсвэл хурдан шалгаж байна уу гэсэн ойлголт байхгүй. Ямар ойлголт байдаг вэ гэхээр гэм буруутай юу, эсвэл гэм буруугүй юу гэдгийг хуулийн байгууллага тогтоох ёстой. Ингэхдээ хуульд заасан үндэслэлээр шалгалт явуулах ёстой. Эцсийн дүндээ цагаан захтан буюу ЖДҮ-чин гишүүдийг суллах зорилготой ийм л хуулийн зохицуулалт. Хуулийн энэ заалтаар С.Баярцогттой холбоотой оффшорын хэрэг цагаадна. Дээр нь Оюутолгойн гэрээтэй холбоотой асуудал, Жастын Ш.Батхүү, С.Зоригийн амь насыг хөнөөсөн хэрэгтэй холбоотой хэрэг бүгд цагаадна. Хуулийн заалтыг өөрчлөх боломжтой гэсэн юм ярьсан байна лээ. Ямар ч нэмэргүй. Адилхан л цагаадна. Яагаад гэвэл хуулийг буцааж хэрэглэх боломжгүй.
-Жирийн иргэдэд яаж тусах бэ?
-Хохирогчдын хувьд бүгдэд л хохиролтой тусна. Бүх насаар нь хорих хэрэг, террористын хэрэгт хөөн хэлэлцэх хугацаа хамаарахгүй. Бусад бүх хэрэгт хамаарна гэж хуульд заасан.
Г.Эрдэнэ
Сэтгэгдэл (8)