Сүхбаатар дүүргийн 17 дугаар хорооны нутаг дэвсгарт өчигдөр нагац ах нь согтууруулах ундааны зүйл хэрэглэсэн үедээ долоон настай охины дөрвөн хурууг цавчиж, халуун ус цацсан хэрэг гарсан байна.

Энэ талаар ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүүгээс тодруулахад, “Бага насны хүүхэд зодуулсан байна гэсэн дуудлага, мэдээлэл энэ сарын 14-ний өдрийн 22.25 цагт цагздаагийн байгууллагад ирсэн. Мэдээллийн дагуу тухайн дүүрэг дэх Цагдаагийн хэлтсээс хэргийн газар дээр очиж, шалгалт явуулсан. Урьдчилсан байдлаар долоон настай охины дөрвөн хуруу тасарсан хэргийг дүүргийн Цагдаагийн хэлтэс шалгаж байна. Хохирогчийг эмнэлгийн байгууллагад яаралтай хүлээлгэн өгсөн. Уг хэрэгт 51 настай эрэгтэй Ш-ийг холбогдуулан шалгаж байгаа бөгөөд тухайн үед согтуруулах ундааны зүйл хэрэглэсэн байсан нь тогтоогдсон” гэв.

Дээрх хэрэгт хохирогчийн гэмтлийн зэрэг тогтоогдсоны дараа холбогдох зүйл заалтаар ял төлөвлөх ёстой.

Б.Лхам