Төрийн байгуулалтын байнгын хорооны өнөөдрийн хуралдаанаар Төрийн албаны зөвлөлийн 2018 оны үйл ажиллагааны тайлантай танилцлаа. Энэ үеэр УИХ-ын гишүүн С.Бямбацогт “Хоёр асуулт байна. Нэгдүгээрт, төрийн албанаас хууль бусаар халагдсан гэсэн гомдол саналыг яаж шийдэгдэж байна вэ. Цаашид энэ асуудлыг хэрхэн шийдэх юм бэ. Хоёрдугаарт, төрийн албан хаагчийн чадавхыг дээшлүүлж, сахилга бат, хариуцлагыг дээшлүүлэх хэрэгтэй байна. Үүнийг яаж шийдэх вэ” гэхэд

Төрийн албаны зөвлөлийн гишүүн Б.Идэрчулуун “Төрийн албаны хууль хэрэгжээд 100 хонож байна. Ажлаас үндэслэлгүй халагдсан 26 тохиолдол байна. Бид үүнийг засахаар албан даалгавар хүргүүлсэн. Мөн үндэслэлгүй халагдсан зарим хүмүүсийг буцааж ажилд нь оруулсан. Албан тушаалтны шийдвэрээр ажлаас үндэслэлгүй халагдсан хүмүүсийг ажилд нь буцааж авах шаардлага тавьсан. Өнгөрсөн онд энэ чиглэлээр төрийн алба хаагчдад сургалт явуулсан. Одоогоор бид үнэлэмжийг хувилж үзээгүй. Гэхдээ төрийн албан хаагчийн чадавх суларсан гэдэгтэй санал нэг байна. Цаашид төрийн албан хаагчийн чадавхыг дээшлүүлэхийн тулд тогтвортой ажиллуулах, гүйцэтгэлийн төлөвлөгөөг бодитоор үнэлэх ёстой гэж үзэж байна. Мөн богино болон дунд хугацааны сургалтад хамруулахаар зохих үр дүнгээ өгөх байх гэж бодож байна" гэлээ.