Хүүхэд нас. Амьдралын аз жаргал, баяр баясгаланг мэдэрч, гуниг гутрал, хар муу бүхнээс ангид байх гэгээн үе. Өөрийнх нь ой ухаанд бүрэлдэж буй төсөөлөл болгоноо тоглоомоор илэрхийлдэг тийм л гэнэн цагаахан балчир үрс. Тэд тоглоомдоо бүхэл бүтэн ертөнцийн төсөөллийг багтааж, хүсэл мөрөөдлөөрөө жигүүрлэн гайхамшгийг зурж байдаг тийм л ертөнцтэй. Гэвч инээд хөөрөөр цалгихын оронд зовлон гуниг, харгислалын дор бяцхан зүрх шимширч байна. Балчир үрс маань балмад эрчүүд, хахир эмэгтэйчүүдийг бах тавыг хангагч гарын шүүс нь болж хувирлаа. Энэ хүний эрхийг дээдлэгч, хүмүүнлэг энэрэнгүй ардчилсан нийгэм гэж үү.

Цоожтой хаалганы цаана томчуудын үйлдсэн гэм бүхний ард олон хүүхэд энэлэн шаналж байна. Тэд айж байна. Уржигдар 22.00 цагийн орчимд долоон настай охины дөрвөн хурууг цавчсан хэрэг гарав.

Хэргийг үйлдсэн этгээд 51 настай, хохирогч охины нагац ах нь. Тухайн үед согтуу байсан гэдгээ өчөөд “уучлал эрэн уйлсан” гэх.

Гэмт этгээд өмнө нь охиныг нэг ч удаа зодож байгаагүй. Харин хэрэг гарсан өдөр согтууруулах ундааны зүйл хэтрүүлэн хэрэглэсэн. Юу ч санахгүй байна” гээд уйлж нэг, гэдийж нэг хэлсэн гэдгийг эх сурвалж хэлсэн юм.

Гэмт этгээд Ш нь охин руу халуун ус цацаж, зазуураар толгой руу нь нэг удаа цохисон байна. Энэ үеэр охин гараараа толгойгоо хаах үед гарын дөрвөн хурууг нь цавчжээ.

Улмаар охин гэрээсээ зугтан гарч, гудамжинд явахад нь хүмүүс тусалжээ. Охин одоо ГССҮТ-д хэвтэн эмчлүүлж байна. Охины баруун гарын нэг, хоёрдугаар хурууны I, II үеэрээ бүрэн тасарсан. Зүүн гарын гурав, дөрөвдүгээр хуруу I, II үеэрээ тасарсан гэмтэлтэй. Дээрээс нь баруун хөлийн гуяны урд хэсгээрээ түлэгдсэн шархтай. Мөн толгойн тус газраа хөнгөн шархтай эмнэлэгт анх ирсэн. Харин эмч нар яаралтай хагалгааг 13 цагийн турш хийж улмаар гарын гурван хуруу залгаж чадсан. Гэвч зүүн гарын гуравдугаар хурууны I  хэсгийн урдуураа тасарсан бөгөөд залгах боломжгүй байсан тул тайрсан тухай эмч нар мэдээлсэн.

Ийм л харгислал үйлдсэн этгээд уучлал эрэн уйлж чадсан гэхээр санаанд багтахгүй юм. Хойт эцэгтээ хүчиндүүлж, зодуулсан харгислалын олон хэрэг гарсан. Хүний хүн юм даа гээд зүхэх нэг өөр. Гэвч энэ бол охины нагац ах. Ийм өөрөөсөө өөр хэнд ч найдаж боломгүй нийгэмд бид амьдарч байна.

• 2013 оны аравдугаар сард ээж нь хүүхдийнхээ толгойг заазуурдсан,
• 2018 оны арваннэгдүгээр сард хойд эцэг нь 16 настай дагавар хүүхдээ заазуурдсан,
• 2013 оны наймдугаар сард нагац эгч С нь 10 сартай А-г зодож гэмтээсэн.
• 2014 оны гуравдугаар сард төрсөн эцэг нь 2, 8 настай хоёр хүүхдээ хазаж, гэмтсээсэн
• 2015 оны гуравдугаар сард дөрвөн настай охиныг төрсөн аав нь хойд ээжтэй нь нийлэн тамлан зовоож, хорьжамь насыг нь бүрэлгэсэн.

• 2019 оны гуравдугаар сард хойд эцэг нь дөрвөн настай хүүг зодож гэмтээсэн. Хүү ГССҮТ-д хэвтэн эмчлүүлэхэд элэг, дэлүү бяцралттай, тохой хугарсан, зөөлөн эдийн гэмтэлтэй гэж гарсан.
• 2018 оны дөрөвдүгээр сард гурван настай охиныг хойд эцэг нь зодож гэмтээсэн.
• 2018 оны наймдугаар сард “Очир” төвд 13 настай охиныг хүчирхийлж, зэрлэгээр амь насыг нь хөнөөсөн.Хүүхэд хүчирхийлсэн, тамлан зовоож амь насыг нь хөнөөсөн хэргийг дурдаад байвал дуусахгүй.

Он гарсаар эхний гурван сарын байдлаар гэр бүлийн хүчирхийлэл үйлдэж баривчилсан хүний тоо Баянзүрх 347, Сонгинохайрхан 54 байна. Хамгийн гол нь хүчирхийлэл бүрийн ард хүүхэд байдаг гэж Нийслэлийн цагдаагийн газрын Хүүхдийг гэмт хэргээс урьдчилан сэргийлэх хэлтсийн дарга, цагдаагийн хурандаа Б.Батзориг хэвлэлд өгсөн мэдээлэлдээ онцолжээ. Өөрөөр хэлбэл, гэр бүлийн хүчирхийлэл хэмээн цагдаагийн байгууллагад ирүүлсэн дуудлага бүрийн ард ямар нэгэн байдлаар хүүхэд өртсөн байдаг гэсэн үг.

2012-2017 оны хооронд гэхэд 1613 хүүхэд төрж, 20 хүртэлх насны 1668 эх үр хөндүүлжээ. Хүчирхийллийн 70 орчим хувь нь ураг төрлийн орчинд үүсдэг гэсэн судалгаа байна. Мөн энэ оны эхний улирлын байдлаар 70 орчим хүүхэд бэлгийн хүчирхийлэлд өртсөн. Энэ бол зөвхөн цагдаагийн байгууллагад бүртгэгдсэн, ил байгаа тоо. Үүнээс гадна бие болоод сэтгэл зүйн хүчирхийлэлд өртсөн хүүхэд олон бий.

Уг нь манай улсад хүүхдийн төлөө ажиллах үүрэгтэй хороодын “Хамтарсан баг” ажилладаг. Хороодын Засаг даргаар ахлуулсан “Хамтарсан баг” нь хүүхдийн төлөө ажиллах ёстой  үндсэн нэгж байтал энэ үүргээ биелүүлдэггүй Засаг дарга нар олон байдаг байна. Хууль гаргах нь асуудлыг шийдэх нэг хэсэг нь ч үүнийг дунд шат, доод шатандаа сэтгэл гаргаж хэрэгжүүлэх нь хамгийн гол асуудал болоод байна. Хамтарсан баг бүр хариуцсан хороондоо хүчирхийллийн эрсдэлтэй гэр бүл, хүүхдийг таньж мэдэх, тэдэн рүү чиглэсэн ажил, арга хэмжээгээ яаж зохион байгуулж байгаа юм вэ гэдгийг асууя. Үнэхээр хангалттай ажиллаж чаддаг байсан бол долоохон настай охин хуруугаа тайруулаад сууж байх байсан уу. Өндөр хөгжилтэй орнуудад бол хүүхдийн биед жаахан л шарх, сорви үүсэхэд ээж аавыг шалгаж, хүүхдийг тусгаарлаж бүр эцэг эх байх эрхийг нь хүртэл хасдаг. Тнд хүүхдээ ингэж л хамгаалдаг.

Харин бид балмад этгээдийн үйлдлийг өөгшүүлсээр суух уу. Зэрлэг авиртнуудын үйлдэл хэрээс хэтэрч байгааг айдас хургасан, өнчин нулимстай хорвоог үдэж байгаа бяцхан үрс бие махбодиороо харуулж байхад бид хүлцэнгүй байсаар байх уу. Хайр энхрийлэл, аз жаргалаар бялхаадгүй юм гэхэд айдасгүй нийгмийг тэдэнд бэлэглэмээр байна. Хүүхдийн хүчирхийлэл ээлж дараалан гарч байхад хүүхдийн төлөө байгууллагууд хаана байна вэ.

Б.Лхам