Хан-Уул дүүргийн 15-р дунд сургуулийн 500 гаруй хүүхдээс сүрьеэгийн нян илэрсэн, 38 хүүхэд, нэг багш халдваргүй сүрьеэтэй хэмээн оношлогдсон. Тэрвэл энэ талаар Эрүүл мэндийн дэд сайд Л.Бямбасүрэнгээс дараах тодрууллаа.

Тэрбээр "15 дугаар сургуульд нэмж хүүхэд өвчилсөн талаар мэдээлэл ирээгүй. 38 хүүхдэд сүрьеэгийн эмчилгээ хийж байгаа. Халдвар авсан 500 гаруй хүүхэд гэдэг бүгд өвчтэй гэсэн үг биш гэдгийг ойлгох хэрэгтэй. ХӨСҮТ-ийн Тандалт судлалын баг хуваарийн дагуу тандалт хийгээд явдаг. Сүрьеэ их илэрч байгаа мэт харагдавч энэ нь эрт илрүүлдэгтэй холбоотой. Манай эмч, мэргэжилтнүүд эрт илрүүлж чадаж байна.

Сүрьеэгийн эмчилгээ үнэгүй.

НҮБ-ын зөвлөмж, стандартын дагуу эмчилдэг. Эцэг, эхчүүдээс энэ талаар нуусан зүйлгүй. Хэлээд явна шүү дээ. Сорилоо тавина, 72 цагийн дараа хэмжилтээ хийнэ. Бүгд ном журмын дагуу хийгддэг. Сүрьеэгээр өвдсөн багш эмчлэгдсэн байсан. Сургуулийн багшийн томилгоо бол өөр салбарын асуудал. Ямарваа нэгэн хүнийг эмчлээд, зургаан сарын турш хянаад явдаг" гэлээ. Мөн тэрбээр "97 дугаар сургуулийн талаар ямар нэгэн мэдээлэл ирээгүй байна" гэдгийг хэлсэн юм.

Р.Хишигжаргал