Засгийн газрын нэр бүхий нэг сайд 10 сая ам.долларын авилга авсан гэсэн мэдээлэл гарсан.

Энэ талаар УИХ-ын гишүүн Д.Эрдэнэбат "Би нотолгоотой мэдээлэл эсэхийг тодруулж өгөхийг Ерөнхий сайдаас хүсч албан тоот илгээсэн. Энэ бол нийгмийн анхаарлыг ихээр татсан сэдэв боллоо.

Тиймээс үнэн, худлыг тодруулах шаардлагатай. Худлаа бол энэ мэдээллийг хаанаас гаргасан гэдгийг олоход амархан.

Үнэн бол яг ямар үйл явц болсныг зайлшгүй тодруулах шаардлагатай. Нэг сайд ийм их хэмжээний авилгын хэрэгт холбогдсон гэсэн мэдээлэл гарна гэдэг бол Засгийн газрыг тогтворгүй болгож байгаа хэрэг. Энэ асуудалд нухаштай хандах хэрэгтэй. Яриад өнгөрөх сэдэв биш. Уул уурхай, хүнд үйлдвэрлэлийн сайд мэдээлэл хийхдээ нэг зүйлийг хэлсэн. Тэр нь "Ерөнхийлөгчийн БНХАУ-д айлчилсан айлчлалын бүрэлдэхүүнд багтсан холбоотой мэтээр ойлгогдохоор зүйл хэлсэн. Тэрийг нь би Ерөнхий сайдад хүргүүлсэн албан тоотдоо тодруулахаар оруулсан. Энэ бол Засгийн газрын нэр хүндээс гадна Монгол Улсын нэр хүндийн асуудал яригдана" гэв.

Тэгвэл энэ асуудлаар Эрчим хүчний сайд Ц.Даваасүрэн "Би Ерөнхийлөгчийн албан ёсны бүрэлдэхүүнд багтаагүй. "Нэг бүс нэг зам" уулзалтад л оролцсон.

Энэ талаар би мэдэхгүй байна. Энэ авилгын тоо санаанд багтахгүй байна.

Сонгууль дөхөж байгаа болохоор ийм худал мэдээлэл гаргасан байж магадгүй" гэлээ.

Р.Хишигжаргал