МАН-ын бүлгийн өнөөдрийн хуралдаанаар Татварын багц хуульд Ерөнхийлөгчийн тавьсан хориг хүлээж авах эсэх болон Оюутолгойн ордыг ашиглах, хөрөнгө оруулалтын хэрэгжилтийг шалгах дүгнэлт гаргах ажлын хэсгийн дүгнэлтийг сонсож хэлэлцжээ. Хурлаар УИХ-ын ээлжит бус чуулганаар баталсан Татварын багц хуульд Ерөнхийлөгчийн тавьсан хориг хүлээж авах боломжгүй гэж бүлгийн нийт гишүүд үзсэн байна. Мөн МАН-ын бүлэгт Оюутолгойн ордыг ашиглах, хөрөнгө оруулалтын гэрээний хэрэгжилтийг шалгах дүгнэлт гаргах ажлын хэсгийн дүгнэлтийг УИХ-ын Д.Тэрбишдагва танилцуулжээ.
Бүлгийн гишүүд ажлыг хэсгийг сайн ажилласан гэж үзээд ажлын хэсгийн дүгнэлтийг дэмжсэн байна. Иймд ажлын хэсгийн дүгнэлтийг байнгын хороо, нэгдсэн чуулганаар хэлэлцэх хэрэгтэй гэж үзжээ.
Үүнээс гадна өнгөрсөн долоо хоногт болсон УИХ-ын гишүүн Ш.Раднаасэд, Д.Дамба-Очир нарт таван жил хүртэлх хугацаанд МАН-аас дэмжлэг үзүүлэхгүй байх намын Хяналтын хорооны шийдвэрийг хэлэлцэж мэдэгдэл гаргасан юм. Тодруулбал, “Хяналтын ерөнхий хорооны шийдвэрийг намын Удирдах зөвлөл хэлэлцэж хүлээж авах эсэхийг шийддэг аж. Иймээс Удирдах зөвлөл өнгөрөгч тав дахь өдөр хуралдаж, Хяналтын ерөнхий хорооны шийдвэрийг хэрэгжүүлэх боломжгүй гэж үзсэн” гэдгийг Бүлгийн дарга Д.Тогтохсүрэн хэллээ.
Р.Хишигжаргал