Монголын сонгодог урлаг тэр дундаа поп опера төрлийн урлагийн тод төлөөлөл болсон хамтлагууд болон сонгодог урлагийн сор болсон дуучдын хамтарсан “Pop Opera Live Concert” долдугаар сарын 13-ны өдрийн 19:00 цагт ДБЭТ-ын тайзнаа болно.

Нийслэлийн Иргэдийн Төлөөлөгчдийн хурал, Засаг даргын Тамгын газраас Улаанбаатар хотыг “Зүүн хойд Азийн бизнес, соёл, санхүү, аялал жуулчлалын төв” болгох зорилтыг дэвшүүлэн дотоод, гадаадын иргэд, жуулчдад зориулсан олон талт арга хэмжээг зохион байгуулдаг. Энэхүү зорилтын хүрээнд жил бүр уламжлал болгон зохион байгуулдаг томоохон үйл ажиллагаануудын нэг нь “Best Of Classics” буюу сонгодог урлагийн тоглолт юм. Энэ жилийн хувьд тус тоглолтыг поп опера хэлбэрээр зохион байгуулж байгаа бөгөөд Нюанс, Увертюра, Консонанс хамтлагууд болон сонгодог урлагийн сор болсон дуучин МУГЖ Ө.Уянга, МУСТА Т.Энхбат, МУСТА Б.Батжаргал, МУСТА Э.Анхбаяр, Э.Адъяасүрэн, Г.Энхнаран нар оролцох юм.

Тулгар төрийн 2228 жил, Их Монгол Улс байгуулагдсаны 813 жил, Ардын хувьсгалын 98 жил, Нийслэл Улаанбаатар хот үүсгэн байгуулагдсаны 380 жилийн ойд зориулан зохион байгуулж буй тус тоглолтыг нийслэлийн Засаг даргын Тамгын газар, нийслэлийн Соёл, урлагийн газраас санаачлан УДБЭТ, “Удиртгал хөгжим” ТББ, Анир студи,  “D Lights” ХХК-тай хамтран зохион байгуулна.

Энд дашрамд дуулгахад, Монгол Улсын Засгийн газраас баталсан “Сонгодог урлаг III” үндэсний хөтөлбөрийн хүрээнд нутгийн өөрөө удирдах байгууллагаас санаачилга гаргаж, нийслэлийн Засаг дарга бөгөөд Улаанбаатар хотын захирагчийн ивээл дор “Best Of Classics” буюу сонгодог урлагийн тоглолтыг жил бүр уламжлал болгон зохион байгуулж иржээ.