Авлигаас олсон 6 тэрбум ам.доллар Монголоос гарч оффшор бүсэд орсон, оффшор бүсэд 17 тэрбум ам.долларын бий  талаар “АТОЗ”-өөс өнөөдөр хэвлэлийн хурал зарлалаа. Энэ үеэр Ард түмний удирдах зөвлөлөөс мэдэгдэл гаргаж, Ерөнхийлөгч Х.Баттулгад өргөн барих гэж буйгаа онцлоод “Оффшортой холбоотой баримт материалыг цуглуулж, ангилж байна. Оффшортой нэр холбогдсон дэлхийн бүх улстөрчид өөрийгөө өмөөрч, “миний нэр төрд халдлаа” гэж гоншигноогүй. Гэтэл манай улстөрчид л “Нэр төр” гэж байна. Хэргээ хүлээх хэрэгтэй. НҮБ-ийн Авлигатай тэмцэх конвенцийг ягштал мөрдөх ёстой. Хууль хяналтынхан ч ялгаагүй. Оффшор 12 бүсэд Монголын 612 компани бүртгэлтэй байна. Эдгээрийн дансанд 6 тэрбум ам.доллар Монголоос шилжиж орсон. АТГ-аас 200 сая ам.доллар оффшор бүсээс орж ирсэн гэсэн. Гэтэл бидний тооцооллоор 17 тэрбум ам.доллартай дүйцэх хэмжээний хөрөнгө, мөнгө оффшор бүсэд бий. 

Гаднын улсаас хүү багатай зээл олгооч гэж монголчууд гуйдаг биз дээ. Гэтэл оффшор бүсэд 17 тэрбум ам.доллар байна. Үүнээс ч илүү байх магадлалтай. Хамгийн сүүлийн үеийн мэдээллээр 50 тэрбум гэсэн тоо хүртэл гарч ирж байна. 2008 оноос хойшх байгалийн баялаг оффшор бүсэд орсон. Энэ бол үнэн. Тиймээс Ерөнхийлөгчид мэдэгдэл хүргүүлж байна. Авлигатай тэмцэхэд АТОЗ шахаж шаардаж ажиллана. Мөн авлигын хэргийг дагнан шүүдэг шүүхтэй болох ёстой. Энэ талаар холбогдох байгууллагад нь хандсан. Ийм шүүхтэй болж байж авлигаас ангижирна" гэв.