Нийслэлийн Сүхбаатар дүүргийн IX хорооны нутаг дэвсгэрт барих “Ногоон нуур 1008 айлын орон сууц” төслийг хэрэгжүүлэх хэлэлцээрийг Барилга, хот байгуулалтын яам, БНХАУ-ын талтай үзэглэж хэсэгчилсэн ерөнхий төлөвлөгөөг баталжээ.

Тодруулбал, “Ногоон нуур 1008 айлын орон сууц” төсөл нь БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр хэрэгжих гэж буй.

Төслийн хүрээнд 21 давхар, зоорьтой, 8 блок барилга барих бөгөөд ирэх оны дөрөвдүгээр сард шавыг тавьж, бүтээн байгуулалтын ажлыг эхлүүлэхээр төлөвлөжээ. Мөн авто зам, авто зогсоол, ногоон байгууламж, 960 хүүхдийн сургууль, 240 хүүхдийн цэцэрлэгийн бүтээн байгуулалт өрнүүлнэ.

Энэ хүрээнд манай улс тухайн хорооллыг барих газрыг чөлөөлж, зураг төслийг бэлэн болгох үүрэг хүлээж байна. Мөн шаардлагатай дэд бүтцийг бүрэн гүйцэтгэж, төслийн барилгажих талбайг бэлтгэх, инженерийн хангамжийг хариуцах юм байна. Энэ талын Ажлын багийг Нийслэлийн Засаг даргын захирамжаар байгуулаад байна. Ажлын баг энэ сарын 13-ны өдөр буюу өчигдөр анхны хуралдаанаа хийж газар чөлөөлөх, иргэдийг түр суурьшуулах болон инженерийн хангамжийн талаар хэлэлцлээ. Тухайн хэсэгт одоогоор 10 айл газраа чөлөөлөөгүй байна. Тиймээс ойрын хугацаанд оршин суугч, иргэдтэй уулзаж, зөвшилцөх замаар газар чөлөөлөх, тухайн өрхүүдийг өөр газарт түр суурьшуулах асуудлыг яаралтай шийдвэрлэх, дэд бүтцийн ажлыг эхлүүлэхэд шаардлагатай талбайг бэлэн болгохоор боллоо.

“Ногоон нуур 1008 айлын орон сууц” төсөл нь БНХАУ-ын Засгийн газраас Монгол Улсын Засгийн газарт олгох 350 сая юанийн буцалтгүй тусламжийн хөрөнгөөр хэрэгжих юм.