Манай улсад хүүхэд хамгааллын чиглэлээр үйл ажиллагаа явуулдаг сайн дурын хэд хэдэн төрийн бус байгууллага бий. Үүнийг нэг нь “Цацрах эгшиг” нийгэмд үйлчлэх төрийн бус байгууллага юм. Тэд хүүхдийни өөртөө итгэх итгэлийг нэмэгдүүлэх, сэтгэл зүйн асуудалд орсон хүүхдийг урлагаар дамжуулам эмчлэх, хөгжүүлэх чиглэлээр хүүхдүүдтэй хамтран ажилладаг. Ингэхдээ үнэ төлбөргүй үйлчилгээ үзүүлдгээрээ онцлог юм. Ингээд “Цацрах эгшиг” ТББ-ын дэд захирал Б.Сарантай хэсэг хором ярилцсанаа хүргэе.

-Байгууллагынхаа талаар манай уншигчдад товч мэдээлэл өгнө үү?

 “Өнөөдрийн энэ нийгэм бидний үр хойч, хүүхэд залууст ээлтэй, аюулгүй, амьдрах таатай орчин байж чадах уу?” гэх асуултыг бид өөрсдөөсөө асуун, нийгэмд эерэг хүмүүс, эерэг хандлагын дуу хоолой болон эгшиглэхийг билэгдэн “ЦАЦРАХ ЭГШИГ” хэмээх нийгэмд үйлчлэх төрийн бус байгууллагыг байгуулсан. Бид хүүхэд залууст урлагийг таниулан сурталчлах, мэдлэгээ тэлэн хөгжихөд нь дэмжлэг туслалцаа үзүүлэх чиглэлээр үйл ажиллагаа явуулж байна. Бидний хамгийн эхний хөтөлбөр “Гэрэлтүүл” төсөл 2018 онд амжилттай хэрэгжиж эхэлсэн байдаг юм.

-Тодруулбал?

-Бид “Бодитоор мэдэрье, эерэгээр харъя” уриатай “Гэрэлтүүл” төслийг залуусыг архи согтууруулах ундааны хэрэглээгээ багасгах, сэтгэцэд нөлөөлөх мансууруулах бодисоос татгалзахад уриалж, чөлөөт цагаа хорт зуршлаас ангид, зөв боловсон өнгөрөөх боломжийг бүрдүүлэх зорилготой явуулсан юм. Тийм ч учраас “Гэрэлтүүл” төслийн хүрээнд зохион байгуулж буй амьд хөгжмийн өдөрлөг болон бусад арга хэмжээг алкохольгүй зохион байгуулдагаараа онцлог. Нийгэмд эерэг хандлага түгээх гэж тэр шүү дээ. Мөн монголын мянга мянган орхигдсон хүүхэд багачуудын дуу хоолой болж, тэдэнд хайр түгээн ирээдүйг нь гэрэлтүүлж, нийгэмд эерэг нөлөөллийг бий болгохоор ажиллаж байна. Манай үйл ажиллагаанд хөгжлийн бэрхшээлтэй болон асрамжийн газрын хүүхдүүд үнэ төлбөргүй хамрагдах боломжтой.

Түүнчлэн техник технологи асар хурдацтай хөгжиж, сошиал сувгуудын хэрэглээ өдөр өдрөөр өсөн нэмэгдэж буй энэ үед технологийн хөгжил, түүний зөв зохистой хэрэглээ, цахим аюулгүй байдал, цахим гэмт хэргээс өөрийгөө хамгаалах зөвлөгөө зэрэг мэдээллийг үнэн зөв, цэгцтэй өгдөг мэдээллийн суваг дутмаг байна. Гадаад эх сурвалжаас мэдээлэл орчуулахад мэргэжлийн нэр томъёо заримдаа гажих талтай байдаг. Мөн соёл, хөгжлийн ялгаа, хувь хүний соёлын ялгаа зэргээс үүдэн харь орны арга техник, зөвлөгөөг шууд хэрэгжүүлэх нь учир дутагдалтай юм. Иймд бид мэргэжлийн түвшинд үнэн зөв мэдээллийг хүргэхээр зорьж “ПУУЖИН” технологийн сувгийг өнгөрсөн оны арванхоёрдугаар сарын 07-ны өдөр нээсэн юм. Энэ хугацаанд хүүхдүүдэд ч их үр өгөөжтэй байгаа нь ажиглагдсан.  

-“Цацрах эгшиг” ТББ хэчнээн хүүхдэд үйлчилгээ үзүүлж байна вэ?

-Манай байгуллагад одоогоор 5-18 насны 300 орчим хүүхэд хамрагдаад байна. Хүүхдийн хөгжлийн талаарх асуудалд бид улсын байгууллагатай хамтран ажилладаг. Мөн Берлин дахь Монголын оюутны холбоотой хамтран сэтгэлгээний өөрчлөлтийг бүтээх зорилгоор арга хэмжээ зохион байгуулж байна. Ташрамд дурдахад, манай төрийн бус байгууллагад гишүүнээр элсэн орох боломж бүрэн нээлттэй гэдгийг уншигчдадаа дуулгая. Тиймээс гишүүнээр элсэх, туслах, хамтран ажиллах хүсэлтэй иргэд, аж ахуйн нэгжийг “Цацрах эгшиг” цахим хуудсаар дамжуулан холбогдоосой гэж хүсэж байна.

Б.Лхам