Үе үеийн хотын дарга нар замын хөдөлгөөний түгжрэлийг бууруулах өөр өөрийн мөрөөдөлтэй. Үүл баатрын үед Улаанбаатарыг метротой болгох санаачилга гарч байв. Амгалан-Толгойт хүртэлх 17,7 км урт “УБ Метро”-ны шавыг нь хүртэл хотын удирдлагууд тавьж байлаа. Эхний ээлжийн төсөвт 1,5 тэрбум долларын хөрөнгө оруулалт төсөвлөж, 49 хувийг нь гаргуулахаар Японы "ЖАЙКА"-г татан оролцуулж байсан юм. Гэвч 2020 онд буюу ирэх жил метротой болох Үүл баатрын мөрөөдөл цаасан дээрээ ч хэрэгжиж амжилгүй халаагаа өгөх нь тэр.

Улаанбаатар метро өртөөг тэмдэгжүүлснийг эс тооцвол өнөөдөр метротой болох нийслэлчүүдийн хүлээлт хэдийнэ унтарч, бүр замхарчээ.

Харин одоо Улаанбаатар хотын захирагчаар ажиллаж байгаа С.Амарсайханд бас нэгэн мөрөөдөл бий болжээ. Тэр нь “Cable Car” агаарын дүүжин зам. Энэ тухай түүний орлогч Б.Отгонсүх ч тодорхой тайлбар өгсөн байна лээ. Тэрбээр “Улаанбаатар хотын авто машины түгжрэлийг бууруулахын тулд нийтийн тээврийг дэмжих ёстой гэж ойлгож байна. Одоогийн нийтийн тээвэрт үйлчилж байгаа автобусны насжилт өндөр, чанар муудсан байгаа. Энэ байдлыг юуны түрүүнд засах ёстой. Тийм учраас нийтийн тээвэрт явж байгаа он дууссан, хуучин автобусыг шинэчилнэ. Дараа нь “Cable Car” агаарын дүүжин зам хийхээр төлөвлөж байна.

Уг төслийн ТЭЗҮ нь дууссан. Дүүжин зам нь Баянхошуунаас III, IV-р хорооллын эцэс хүртэл явна. Ингэснээр иргэд Баянхошуунаас III, IV хороолол хүртэл бүхэл бүтэн цаг зарцуулахгүйгээр 20 хүрэхгүй минут яваад л очдог болно.

Мөн Зайсанд байрлах Миний дэлгүүрээс хүүхдийн ордон хүртэл агаарын дүүжин зам явна. Ингээд ирэхээр нийтийн тээврийн үйлчилгээ сайжирна” гэжээ.

Хотын даргын орлогчийн яриа “бай”-ндаа тусч, бодит ажил хэрэг болбол сайн л хэрэг. Баянхошуунаас III, IV хороолол орох түгжирдэг, заримдаа таг гацдаг иргэдийн цаг завыг хэмнэсэн бүтээн байгуулалт ямар нэгэн эсэргүүцэлтэй тулгарахгүй, иргэд хоёр гараа өргөөд дэмжинэ. Үүнтэй хэн ч маргахгүй. Харин С.Амарсайхан даргын энэ санаачилга бодит ажил хэрэг болж, хөрсөн дээр буух уу эсвэл “Агаарын мөрөөдөл” болох уу, метро шиг замхрах уу гэдэг нь эргэлзээтэй.

Үүл баатрын үед буюу 2012-2016 онд мөнгөтэй, эрх мэдэлтэй байхдаа нийслэлийн удирдлагууд метротой болох гээд бараагүй байхад ганцхан жилийн хугацаанд Баянхошуунаас III, IV хороолол хүртэл агаарын дүүжин зам тавих уу гэдэг нь асуудал. Сонгуулийн шоу болоод өнгөрөх магадлал нь өндөр. Үүнийг цаг хугацаа л харуулна.

Яг ийм санал санаачилга Э.Бат-Үүл даргын үед гарч л байсан. Тэгэхэд “Оюуны Ундраа” группийн ерөнхий захирлаар одоогийн мээр С.Амарсайхан ажиллаж байв. 2016 оны хавраас эхлүүлэхээр төлөвлөсөн уг төслийн хүрээнд Үндэсний соёл амралтын хүрээлэнгээс Их Зайсан цогцолбор хүртэлх 2.8 км агаарын шугам, тус шугамаар зорчих 100 гаруй бүхээг хийхээр хувийн хэвшлийнхэн төлөвлөж байсан юм.

Цагт 1000 хүн тээвэрлэх хүчин чадалтай “AIR 360 Улаанбаатар” төслийн хүрээнд эхний ээлжид 40 орчим тэрбум төгрөгийн бүтээн байгуулалтын ажлыг хийж Үндэсний соёл амралтын хүрээлэнг Их Зайсан цогцолбортой холбохоор тооцоолж байжээ. Энэ хүрээнд Австри, Францын компани гүйцэтгэгчээр нь ажиллах тус төслийн эхний ээлжийн бүтээн байгуулалтын ажлыг 2017 онд, улмаар дахин 40 орчим тэрбум төгрөгийн хөрөнгө оруулалт хийж, Их Зайсан цогцолбороос Богд уулын орой хүртэл дүүжинт тэрэг зорчих агаарын шугам татаж, 2018 оны намар нь ашиглалтад хүлээлгэн өгөхөөр төлөвлөсөн байдаг.

Гэвч урьдчилсан байдлаар дүүжинт тэргээр зорчих тасалбарын үнийг 2000 төгрөг байхаар төсөөлсөн энэхүү бүтээн байгуулалт өнөөдөр ч цааснаас цааш яваагүй л байна. Үүнийг С.Амарсайхан дарга мэдэхгүй биш хамгийн сайн мэдэх нэгэн.

Г.Эрхэс