Ерөнхийлөгч Х.Баттулгын Үндсэн хуульд тусгасан саналуудыг хэлэлцэн, хүлээж авах эсэхээ шийдэхээр МАН-ын бүлэг энэ долоо хоногт хуралдсан. Үндсэн хуульд нэмэлт, өөрчлөлт оруулах хуулийн төслийн хоёрдугаар хэлэлцүүлгийг эхлэхийн өмнө нэгдсэн байр суурьт хүрэх ёстой МАН-ын бүлгийн хуралдаан ирэх сарын 19-нийг хүртэл хойшилсон байна.

Энэ талаар тус бүлгийн дарга Д.Тогтохсүрэн “Ерөнхийлөгчийн санал болон Зөвшилцлийн ажлын хэсгийн шийдвэрүүдийн талаар МАН-ын бүлэг дөрвөн өдөр хуралдсан ч эцсийн шийдвэр гаргаж чадсангүй.  

Ард нийтийн санал асуулга явуулах, гишүүдийн тоог нэмэх, УИХ-ын бүрэн эрхийг нэмэгдүүлэх, сонгуулийн тогтолцоог холимог болгох гэсэн асуудалд Ерөнхийлөгч болон АН-тай зөвшилцөж, ойлголцох шаардлагатай байна.

АН-ын зүгээс ард нийтийн санал асуулга явуулах, Ерөнхийлөгчийг парламентаас сонгодог болъё, УИХ-ын гишүүнийг иргэдийн болон өөрийн хүсэлтээр эгүүлэн татдаг болъё, өрийн дээд хэмжээг ДНБ-ий 60 хувиас ихгүй байхаар Үндсэн хуулиар тогтооё, УИХ-аас баталдаг, орон нутагт эдийн засгийн эрхийг нь нэмэгдүүлье гэдэг санал тавьсан. АН-ын гишүүд орон нутагт ажиллаж байгаа учир энэ сарын 19-нд хуралдах эцсийн шийдээ гаргана гэсэн. 

МАН-ын бүлгийн хувьд УИХ-ын гишүүдийг 108 болгох саналыг хүлээж авахгүй. 

Сонгуулийн тогтолцооны асуудал дээр шийдвэр гаргаагүй байна. Ерөнхийлөгчийн зүгээс “62 гишүүний өргөн барьсан төсөлд миний бүрэн эрхэд халдсан заалтууд байна. Үүнийг анхаараач ээ” гэж хүссэн. Үүнийг эцэслэн шийдээгүй байна” гэв.

Г.Эрдэнэ