Энэ долоо хоногт Тээврийн цагдаагийн алба нийт 1108 дуудлагыг хүлээн авснаас зам тээврийн ослын шинжтэй 738 дуудлага, мэдээллийг шалгаж шийдвэрлэжээ.
Бүртгэдсэн осол хэргийн улмаас нийслэлд 22 хүн гэмтэж, ноцтой зам тээврийн ослын улмаас орон нутагт долоон хүний амь нас хохирчээ. Үүний гурав нь хүүхэд аж.
Тухайлбал, энэ сарын 14-ний өдрийн 06.10 цагийн орчимд Завхан аймгийн Тэлмэн сумын “Нуурын босго” гэх газар Mitsubshi Colt маркийн Э жолоочтой автомашин онхолдож, жолооч 39 настай эрэгтэй Э нас барж, зорчигч 24 настай эрэгтэй А гэмтжээ.
Түүнчлэн энэ сарын 15-ны өдрийн 08.00 цагийн орчимд Өмнөговь аймгийн Ханхонгор сумын Өгөөмөр баг “Тээг” гэх газар Honda Civic маркийн Б жолоочтой автомашин онхолдож, зорчигч 53 настай эмэгтэй С нас барж, жолооч 68 настай эрэгтэй Б, зорчигч 10 настай эмэгтэй А нарын хоёр хүн гэмтсэн хэрэг гарсан байна.
Мөн алба хаагчдаас хийсэн хяналт шалгалтын үеэр согтуугаар тээврийн хэрэгсэл жолоодсон 109 жолоочийг илрүүлэн эрхгүй үедээ согтуугаар тээврийн хэрэгсэл жолоодсон 22 хүнийг шүүхээр баривчилж хуулийн дагуу хариуцлага тооцсон байна. Иймд зам тээврийн болзошгүй аюулаас өөрийгөө болон ойр дотны хүнээ эрсдэлд учруулахгүй байхыг цагдаагийн байгууллагаас анхааруулж байна.
ТЦА
