Ардчилсан намын зөвлөлөөс Үндсэн хуульд оруулах нэмэлт өөрчлөлт оруулах төсөлд санал хүргүүлж байгаа талаар өнөөдөр мэдээлэл хийлээ.

Тодруулбал, өнөөдөр Төрийн байгуулалтын байнгын хороонд 18 санал хүргүүлэхээр болжээ. Зөвшилцлийн ажлын хэсгээс гаргасан үр дүнд тулгуурлан дөрвөн заалтыг хасах саналыг оруулах аж.

Энэ талаар УИХ дахь АН-ын зөвлөлийн дарга Д.Эрдэнэбат “Олонхийн бүлэг Ерөнхийлөгчийн гаргасан санал дээр хуваагдмал байр суурьтай байгаа гэж мэдээлсэн. Мөн АН-ын зөвлөлийн саналыг сонсож зөвшилцье гэсэн. Тиймээс бид саналынхаа томъёоллыг хүргүүлэхэд бэлэн болсон. Үндсэн хуулийн нэмэлт, өөрчлөлтийг хийхдээ зөвхөн 2020 оны сонгуулийг харж хийх ёсгүй. Хамгийн гол нь өнгөрсөн 30 жилийн алдаа оноог зөв дүгнэж, наанадаж улс орны ирээдүйг 20 жилийн багцаатай харж хийх ёстой. Сүүлийн үед Үндсэн хуулийн нэмэлт, өөрчлөлт явж явж ирэх оны сонгуулийн пи ар, улс төрийн хандлага болж хувираад байгаад харамсаж байна. Тиймээс тодорхой зарчмын саналуудаа ажлын хэсэгт хүргүүлнэ.

Тухайлбал, Ерөнхийлөгчийг парламент сонгох ёстой. УИХ-ын гишүүд болон аймаг, нийслэлийн хурлын өргөтгөсөн бүрэлдэхүүнээс Ерөнхийлөгчид нэр дэвшигчийн талаар саналаа нууцлан олонхийн санал авсан нэр дэвшигчийг УИХ Ерөнхийлөгчөөр томилогдсон гэж бүрэн эрхийг нь хүлээн зөвшөөрсөн хууль гаргана.

Төрийн эдийн засаг, төсөв санхүүтэй холбоотой асуудлаар дараах саналыг гаргаж байна. Засгийн газрын өрийн дээд хэмжээ дотоодын нийт бүтээгдэхүүний 60 хувиас илүүгүй байна.  Төрийн татвар хураамжийг зөвхөн хуулиар тогтооно гэж оруулах нь зүйтэй.

Олон улсын шүүхийн шийдвэр нь Улсын Дээд шатны шүүхийн шийдвэрийн хяналтад үл хамаарна. УИХ-ын гишүүн Үндсэн хуулиар заасан үүргээ биелүүлэхгүй байгаа нь түүнийг Их Хурлын гишүүнээс эгүүлэн татах өнцөг болно” гэсэн саналыг тусгана гэв.

Орон нутаг бие даасан төсөвтэй байх ёстой. Харин төсвийг хэрхэн зарцуулах нь татварын дагуу батлагдсан хуулийн хэмжээнд өөрсдөө захиран зарцуулах эрхийг орон нутагт олгохгүй бол орон нутгийн хөгжлийн асуудал талаар болно гэж харж байгаа гэсэн юм.

Б.Лхам