Улсын онцгой комиссын өргөтгөсөн хуралдаан Төрийн ордонд боллоо. Тус хуралд Засгийн газрын гишүүн болон 21 аймгийн Засаг дарга нар оролцсон юм.

Энэ үеэр Улсын Онцгой комисс энэ онд авч хэрэгжүүлэх мэдээллийг Комиссын Нарийн бичгийн дарга, хурандаа М.Энх-Амар “Энэ сарын эхний долдугаар сарын байдлаар гамшгийн үүссэн нөхцөл байдалтай холбогдуулан Улсын Онцгой комиссын ОБЕГ-т нийт 3692 удаагийн аюулт үзэгдэл, ослын тохиолдол бүртгэгдсэн. Гамшгийн улмаас 22 хүүхэд, 132 том хүн амиа алдаж, 54 хүн гэмтэж 26050 толгой мал хоргодож, 30.8 тэрбум төгрөгийн шууд хохирол учирсан.

Өнөөдрийн байдлаар гамшгийн үүссэн нөхцөл байдалтай холбогдуулж Улсын Онцгой комиссыг нэг, ажлын хэсгийн хурлыг хоёр удаа зарлан хуралдуулж Онцгой комиссын албан даалгавар нэг, Даргын тушаал гурав, шадар сайдын тушаал нэгийг гаргуулж удирдлагаар ханган ажиллаж байна. Гамшгийн хор уршгийг арилгах, сэргээн засварлах ажилд зориулан Засгийн газрын гурван удаагийн хуралдаанаар нийт 11.8 тэрбум төгрөгийн хөрөнгийг шийдвэрлүүлсэн. Үүнд Засгийн газрын нөөц сангаас зарцуулсан 11.1 тэрбум төгрөгийн 4.4 тэрбум нь малын нөхөн төлбөр, 2.9 тэрбум төгрөг нь тоногт урамшуулал, 1.5 тэрбум нь улсын нөөцөөс үнийг нь 50 хувь хөнгөрүүлсэн өвс тэжээл тэдгээрийг буцаан нөхүүлэх зардал, 1.4 тэрбум нь улсын нөөцөөс олгосон автомашин, гэр тусламж, 592 сая төгрөг нь байгалийн гамшиг аюулт үзэгдлийн улмаас учирсан хохирлыг арилгах бусад зардал эзэлж байна.

Энэ оны эхний хагаст аймаг, нийслэлийн хэмжээнд тохиолдсон гамшгийн улмаас учирсан хохирлыг арилгах, сэргээн босгох, урьдчилан сэргийлэх зорилгоор Засаг дарга нарын нөөц сангаас 2.6 тэрбум төгрөг зарцуулжээ.

Өнөөдрийн байдлаар улсын хэмжээнд 89 удаагийн ой хээрийн түймэр бүртгэгдэж, урьдчилсан байдлаар 50 мянган га ой, 255 мянган га хээрийн талбай буюу нийт 350 мянган га талбай түймэрт өртөж 13 байшин, гурван гэр шатсан байна. Түймрийг унтраах ажиллагаанд Онцгой байдал, Хилийн цэрэг, Цагдаагийн байгууллага, орон нутгаас 4513, 573 техник хэрэгсэл, 127 морьтойгоор дайчлагдан ажилласан.

Түймрийг улмаас экологи, байгальд 23.7 тэрбум төгрөг, түймрийг унтраахад 449.6 сая төгрөгийн зардал гарсан. Улсын Онцгой комиссын 01 тоот албан даалгаврын хүрээнд Монгол Улсын Шадар сайд, БОАЖ-ын сайдын хамтарсан тушаал гарч, байгаль орон нутагт хэрэгжүүлэн ажиллаж байна. БОАЖЯ, Хил хамгаалах ерөнхий газартай хамтран 2019 онд Сэлэнгэ, Хэнтий, дорнод, Увс аймаг дахь улсын хил дагуу 592 км түймрээс хамгаалах шороон зурвасыг дахин боловсруулах Сэлэнгэ, Завхан аймгийн хилийн шугамын дагуу 77 км хамгаалах зурвасыг шинээр байгуулах ажилд гэрээ байгуулан хамтран ажиллаж байна” гэлээ. 

Б.Лхам