2016 оны Рио-де-Жанейргийн зуны олимпийн наадмын үеэр хувцасаа тайлан шидсэн дасгалжуулагч Ц.Цогтбаяр, Б.Баяраа нарын эл үйлдэл “Дэлхийн спортын шуугиант 10 үйл явдал”-д багтсан билээ. Дуулианы эзэд болох эдгээр дасгалжуулагчид нь чөлөөт бөхийн 65 кг-ын жинд барилдсан Монгол Улсын гавьяат тамирчин Г.Мандахнаран хүрэл медаль хүртэх боломж байсан гэж үзсэн учраас талбай дээр хувцасаа тайлж ийнхүү эсэргүүцэл үзүүлсэн юм.
Үүнийх нь хариуд Дэлхийн бөхийн нэгдсэн холбооноос 2016 оны есдүгээр сарын 13-нд Монголын чөлөөт бөхийн холбоог 39 мянган фунт стерлингээр торгож, дээрх дасгалжуулагчийн эрхийг 2019 оны наймдугаар сар хүртэл хасах шийдвэр гаргасан юм. Тэгвэл тэдний торгуулийн хугацаа энэ сараар дуусч, дэвжээнд дахин гарах эрхтэй боллоо.
Ингэсээр тэд ирэх 2020 оны Токиогийн олимпод тамирчидтайгаа оролцох бүрэн боломжтой болж байгаа аж.