Завхан аймгийн Дөрвөлжин сумын Онц багийн нутагт орших Бага нууранд шувууд олноор үхсэн тухай бид мэдээллэсэн билээ. Тэгвэл өчигдөр орой буюу энэ сарын 2-ны байдлаар үхсэн шувууны тоо нэмэгдсээр 1521 болсон тухай мэдээлэл байна. Эх сурвалжуудын мэдээлж байгаагаар анх бор галуу, цахлай, алаг нугас зэрэг 30 орчим шувуу үхсэн юм байна. Гэвч хоёр хоног өнгөрөөгүй шахуу байхад 16 төрөл зүйлийн 1500 гаруй шувуу үхсэн байна.

Шувуу үхсэн тухай мэдээллийг тус сумын Засаг дарга өнгөрсөн сарын 30-нд аймгийн Онцгой байдлын газарт мэдэгдсэн байдаг. Энэ дагуу онцгой албаныхан үхсэн шувуудаас дээж авч шинжилгээнд явуулж, сэгийг булж, цэвэрлэсэн юм. Одоогийн байдлаар Улсын мал эмнэлэг, ариун цэврийн төв лабораторид хийсэн шинжилгээний хариу гараагүй байна.

Албаны зарим эх сурвалжийн мэдээлж байгаагаар шувууд олон тоогоор үхэж буй нь халдвартай болох нь батлагдвал Завхан аймагт хөл хорио тогтоох хэмжээнд хүрч магадгүйг хэлсэн юм. Нутгийн иргэдийн хэлснээр үхсэн шувуудын сэг зэм нуурын захаар хөглөрөх нь халдварт өвчин дэгдэх эрсдэлийг бүрдүүлээд байгаа аж. Тиймээс яаралтай арга хэмжээ авахыг албаны хүмүүсээс хүссэн гэлээ. 

Г.Алимаа