Парламентаар Үндсэн хуульд нэмэлт, өөрчлөлтийг хэлэлцэж байгаа нь УИХ-ын гишүүд тэр дундаа МАН-аас өндөр хариуцлага, сахилга бат шаардсаар сар гаруйн хугацаа өнгөрч байна. Энэ хооронд МАН-ын ахмад гишүүдийн зүгээс залуучуудаа хариуцлагатай хандахыг захиж, заримд нь шүүмж дайгаад амжсан. Жишээ нь, Хууль зүй, дотоод хэргийн сайд Ц.Нямдорж “Ганц удаа сонгогдчихоод Ерөнхий сайд болчихдог, сонгогдоогүй байж сайд болчихдог. Хэн болчихсон юм. Залуучууд албан тушаал бий болохоор гарч ирдэг. Ард түмний эрх ашгийг хэлэлцэж байна. Зарим нь бүтэн гурван жил унтлаа. Болоо юм биш үү. Чингэлтэйн Д.Ганболд Үндсэн хуулийн, нэмэлт өөрчлөлтийг хэлэлцэхийг мэдсээр байж онгоцонд суугаад алга болсон байна лээ. Бид нар та нараас ичиж байна. Энэ этгээдүүдээс болж О.Баасанхүүгээр өдөр болгон бичлэг хийж байна. Б.Пүрэвдоржид өдөр болгон загнуулж байна. Ийм байдлыг өнөөдрийг хүртэл үзээгүй юм байна” хэмээн жавтий хүртээсэн нь саяхан. Гэвч парламентад 64 суудалтай үнэмлэхүй олонхийг бүрдүүлж байгаа МАН-ын гишүүдийн ирц төдийлөн хангалттай хэмжээнд хүрч чадахгүй, шүүмжлэл дагуулсаар хэвээр байна.

Үүнтэй холбоотойгоор УИХ-ын дарга Г.Занданшатар захирамж гаргаж гишүүдийн гадаад, дотоод томилолтод энэ сарын 30-ныг дуустал хөл хорио тогтоосон юм.

Гэтэл УИХ-ын даргын захирамж нэр бүхий гишүүний дархан эрхэнд нөлөөлөөгүй бололтой. Юу гэхээр ОХУ-ын Владивосток хотноо зохион байгуулсан Дорнын эдийн засгийн чуулга уулзалтад оролцохоор эх орноосоо мордсон Ерөнхийлөгч Х.Баттулгын айлчлалын бүрэлдэхүүнд Б.Дэлгэрсайхан гишүүн ганцаараа торойгоод зогсож байх юм.

Уг нь парламентаар хэлэлцэж байгаа асуудлын хүрээнд, УИХ-ын даргын захирамжад үндэслэсэн ч Б.Дэлгэрсайхан гишүүнд чухал баймаар. Гэвч бизнесийн салбараас төр түшилцэхээр саарал ордонд орж ирсэн түүнд Ерөнхийлөгчийн айлчлалын бүрэлдэхүүнд багтаж, гаднын хөрөнгө оруулагчидтай уулзалт, яриа хийх нь чухал байсан бололтой. Ямартай ч УИХ-ын дарга нь захирамж гаргаж энэ сарын 30-ныг хүртэл гишүүдийн гадаад, дотоод томилолтыг хорьчихсон байхад түүнийг нь зөрчиж ОХУ-ыг зорьсон Б.Дэлгэрсайхан гишүүнд ямар хариуцлага тооцохыг харах л үлдэж байна. Улс орны эрх ашиг, тусгаар тогтнолтой холбоотой “Эцэг хууль”-даа гар хүрэхээр зэхэж буй энэ цаг үед гишүүн бүр амин хувийн асуудлаа хойш тавих учиртайг, ард түмнийг төлөөлөн тангараг өргөсөн хуульч гишүүн Б.Дэлгэрсайхан эрхбиш мэдэж л байлтай.

Г.Эрхэс