УИХ-ын гишүүн Л.Болд, Ж.Батзандан нар УИХ-ын чуулганд суухаас татгалзаж, картаа сугалсан байна. Энэ талаар тэрбээр “Стратегийн ордын 51 хувиас доошгүйг Монголын ард түмэнд өмчлүүлэх ёстой гэсэн заалтыг эрх баригч унагасан. Тиймээс УИХ-ын Л.Болд бид хоёрын зүгээс чуулганд оролцохгүй гэсэн байр суурьт нэгдсэн. Үндсэн хуульд нэмэлт, өөрчлөлт оруулах асуудал бантан болж дууслаа. Хамгийн чухал заалтууд унаж дууслаа.

Монголд хортой, хэрэггүй заалтуудыг батлах гэж байна.

Тиймээс үүнтэй тэмцэнэ. Ерөнхий сайд танхимаа бүрдүүлдэг байх асуудалд бид оролцоогүй, картаа сугалсан. Учир нь баялагийн асуудлаа түрүүлж ярих ёстой. Үүнийг шийдээгүй байж дараагийн асуудлыг ярих ёстой. Ерөнхий сайдад танхимаа бүрдүүлэх эрхийг өгөх ёстой. Гэхдээ үндсэн чиглэлийн яамдын сайдыг УИХ-аас томилдог байх ёстой. Бүх сайдыг 100 хувь өөрөө сонгох нь хэт нэг талыг барьсан зүйл болно. Үндсэн чиглэлийн дөрвөн яам байдаг. Үүнд Хууль зүй, дотоод хэргийн яам, Сангийн яам, Гадаад харилцааны яам, Байгаль орчин, аялал жуучлалын яам. Эдгээр яамдаар дамжуулж, Засгийн газрын уялдаа холбоог хангаж байж төрийн ажил явна.

Зарчмын хувьд ашиг сонирхолтой эсэх зүйлийг УИХ-ын гишүүн Д.Лүндээжанцангаас өөрөөс нь асуу.

Түүн шиг бөөрөнхий хүн Үндсэн хуулийг өөрчилдөггүй юм.

Саналыг нь дэмжихгүй болохоор нь гишүүдийг доромжилдог. Ийм байж болохгүй. Үндэсний эрх ашгаа бодож, Үндсэн хуульд хариуцлагатай хандах ёстой. Түүний саналаар явах юм бол Засгийн газар тогтворгүй болно шүү” гэлээ.

Г.Эрдэнэ