Энэ сарын 10-ны өдөр Захиргааны хэргийн давж заалдах шатны шүүхэд “Ноён уулаа аврах хөдөлгөөн” НҮТББ-ын нэхэмжлэлтэй, Ашигт малтмал, газрын тосны газрын Кадастрын хэлтэст холбогдох захиргааны хэргийг 55 дахь удаагийн шүүх хурлаар “Сентеррагоулд монголия” ХХК-ийн эзэмшлийн тусгай зөвшөөрлүүдийг хүчингүй болгох шийдвэр гаргасан билээ. Үүнтэй холбогдуулан Засгийн газрын ээлжит хуралдаанаар Ноён уулыг улсын тусгай хамгаалалтад авч дархан цаазат болгох Ерөнхий сайдын өгсөн чиглэл өгсөн юм. Тэгвэл БОАЖ-ын сайд Н.Цэрэнбат “Сэлэнгэ аймгийн Мандал сумын нутагт орших Ноён уул орчмын газрыг улсын тусгай хамгаалалтад авахаар боллоо. Ингэснээр дархан цаазат газар болгож ангилал ахиулах юм. 1995 оны зургадугаар сарын 29-нд Сэлэнгэ аймгийн ИТХ-аас тус уулыг орон нутгийн тусгай хамгаалалтад авах шийдвэр гаргаж байсан. Түүнээс нэг өдрийн өмнө хамгийн анх 359.7 га газарт алтны хайгуул хийх тусгай зөвшөөрөл олгосон нь тогтоогдсон. Улмаар энэ бүс нутагт нийтдээ 12 лицензийг таван аж ахуйн нэгжид олгосон байна.

Тодруулбал, 1995 оны арванхоёрдугаар сар, 1997 оны тав, арваннэгдүгээр сар, 2000 оны наймдугаар сар, 2001 оны зургаа, есдүгээр сар, 2002 оны нэгдүгээр сар, 2004 оны арваннэгдүгээр сард лиценз олгогдсон байна. Үүнтэй холбогдуулан Шадар сайдаар ахлуулсан ажлын хэсгийг Ноён уул орчимд олгогдсон тусгай зөвшөөрлүүдийн материалын бүрдүүлэлтэд хуулийн зөрчил байгаа эсэхийг шалгах, хууль хяналтын байгууллага хяналт тавихыг даалгасан” гэлээ.

Г.Алимаа