Үндэсний статистикийн хорооноос өнгөрсөн сарын нийгэм, эдийн засгийн дүн мэдээг танилцууллаа.

Тодруулбал, улсын хэмжээнд 2019 оны эхний 8 сард 51.5 мянган эх амаржиж, 51.9 мянган хүүхэд мэндэлжээ. Энэ нь өмнөх оны мөн үеэс амаржсан эх 180 буюу 0.4 хувь, амьд төрсөн хүүхэд 250 буюу 0.5 хувиар нэмэгдсэн үзүүлэлт аж.

Харин өнгөрсөн сард 6580 эх амаржиж, 6620 хүүхэд төрүүлсэн нь өмнөх сараас амаржсан эх 296 буюу 4.3 хувиар, амьд төрсөн хүүхэд 327 буюу 4.7 хувиар тус тус буурчээ.

Мөн нялхсын эндэгдэл 2019 оны эхний 8 сард 681 болж, өмнөх оны мөн үеэс 11 буюу 1.6 хувиар, тав хүртэлх насны хүүхдийн эндэгдэл 820 болж, өмнөх оны мөн үеэс 50 буюу 5.7 хувиар буурсан байна. Тэгвэл өнгөрсөн сард нялхсын эндэгдэл 82 болж, өмнөх сараас 4 буюу 5.1 хувиар, тав хүртэлх насны хүүхдийн эндэгдэл 100 болж, 12 буюу 13.6 хувиар тус тус нэмэгджээ.

1000 амьд төрөлтөд ногдох нялхсын эндэгдэл 2019 оны эхний 8 сард 13 болж, өмнөх оны мөн үеийн түвшинд, тав хүртэлх насны хүүхдийн эндэгдэл 16 болж, өмнөх оны мөн үеэс 1 хүүхдээр буурсан байна. Харин өнгөрсөн сард 12 болж, өмнөх сараас 1-ээр, харин тав хүртэлх насны хүүхдийн эндэгдэл 15 болж нэмэгдсэн байна.

Б.Лхам