ЭМЯ-ны харьяа Эрүүл мэндийн хөгжлийн төвийн Эм, эмнэлгийн тоног төхөөрөмжийн албанд Эрүүл мэндийн салбарын хэмжлийн нэгдмэл байдлыг хангахад нэн шаардлагатай тоног төхөөрөмжийн шалгалт баталгаажуулалт хийх зориулалттай 89.6 сая төгрөгийн үнэ бүхий АНУ-ын “Fluke biomedical”  үйлдвэрийн гурван нэр төрлийн долоон ширхэг тоног төхөөрөмжийг хүлээлгэн өглөө.

Эрүүл мэндийн хөгжлийн төв нь 14 нэр төрлийн эмнэлгийн тоног төхөөрөмжийн шалгалт баталгаажуулалтыг хийдэг байсан бол энэхүү хөрөнгө оруулалт хийгдснээр шинээр гурван нэр төрлийн тухайлбал ургийн монитор, нярайн фото эмчилгээний аппарат, кварцын аппаратны ажиллагааг шалгах боломжтой болж байна.

Мөн ЭХЭМҮТ болон Нийслэлийн Өргөө, Хүрээ, Амгалан амаржих газрууд, 21 аймгийн нэгдсэн эмнэлэг, БОЭТ нийт 26 эрүүл мэндийн байгууллагын инженерүүдэд 90.1 сая төгрөгийн эмнэлгийн тоног төхөөрөмжийн засвар үйлчилгээний дөрвөн нэр төрлийн иж бүрэн багаж, хэрэгсэл хүлээлгэн өгчээ. Ингэснээр эмнэлгийн тоног төхөөрөмжийн ашиглалт, аюулгүй ажиллагаа, засвар үйлчилгээ тасралтгүй явагдах нөхцлийг бий болгож байгаа юм байна.

Эрүүл мэндийн салбарт шинээр олон програм хангамжууд нэвтэрч байгаагийн нэг нь “Эмнэлгийн тоног төхөөрөмжийн хөрөнгийн төлөвлөлтийн систем” програм бөгөөд энэ төслийн санхүүжилтээр дээрх 26 байгууллагын инженер бүр Samsung  Galaxy Tab A маркийн таблеттай болж байна.

Уг таблетыг ашиглан эмнэлгийн тоног төхөөрөмжийн мэдээллийн сангийн програмын үйл ажиллагааг тогтмолжуулах, мэдээллийг цаг тухай бүрт оруулснаар эрүүл мэндийн салбарын эмнэлгийн тоног төхөөрөмжийн тоо мэдээлэл, засвар үйлчилгээний төлөв байдал, хэрэгцээ шаардлагын судалгааг шууд авах боломж бүрдэж байна.