УИХ-ын гишүүдийг сахилга баттай байх хичээл заах учиртай Ёс зүйн дэд хорооны ирц бүрдэхгүй байгаагаас болж удаа дараагийн хуралдаан хойшлоод буй. Хэдийгээр өнгөрсөн зургадугаар сард тус дэд хорооны даргыг сольж, оронд нь гишүүн Б.Бат-Эрдэнийг томилсон ч байдал дээрдсэнгүй. Тэгвэл УИХ-ын чуулганд суудаггүй Б.Наранхүү гишүүнээс гадна давхар дээлтэй гишүүдийг тус дэд хорооны гишүүнээс хасах саналыг УИХ-ын гишүүн Б.Бат-Эрдэнэ гаргалаа.

Тэрбээр “Ирэх долоо хоногт хуралдана. Чуулганд суудаггүй, давхар дээлтэй гишүүд дэд хорооны дэгийг алдагдуулж байна. Жишээлбэл, “Чуулганд огт суудаггүй Б.Наранхүү гишүүнийг Ёс зүйн дэд хорооны гишүүнээс хасаж өгөөч ээ” гэдэг хүсэлтийг АН-ын зөвлөлийн дарга Д.Эрдэнэбатад гаргасан. Үүнээс гадна давхар дээлтэй хэд хэдэн сайд байна. Үнэхээр хэцүү байна” гэсэн юм.

Энэ сарын 8-ны өдрийн 12.00 цагт товлогдсон Ёс зүйн дэд хорооны хуралдаанаар ёс зүйн зөрчил гаргасан ЖДҮ-чин гишүүдийн асуудлыг хэлэлцэхээр товлосон байна. Мөн бүрэлдэхүүн өөрчлөх асуудлаас гадна тус хорооны дүрмийг өөрчлөх асуудлыг мөн хэлэлцэх юм байна.

Г.Алимаа