УИХ-ын гишүүн асан Д.Гантулгыг бүрэн эрхээс нь түдгэлзүүлж, үүрэгт ажлаас нь чөлөөлөхөөс өмнө Хэнтийн 42 дугаар тойрогт Н.Энхбаяр, С.Ганбаатар тэргүүтэй МАХН-ын удирдлагууд иргэдтэй уулзалт зохион байгуулдаг байв. Д.Гантулгыг бүрэн эрхээс нь түдгэлзүүлж, УИХ-ын гишүүний сэнтийгээс буулгах эсэх нь тодорхойгүй явсан ч, МАХН Хэнтийн тойргийг “бай”-ндаа авч "усалж", тордож эхэлсэн нь энэ байв. Тэгэхэд МАХН-ын дэд дарга С.Ганбаатар “Уул уурхайн баялгаа хулгайгүй болгоё. Ингэснээр дээд боловсролоо үнэгүй болно. Орон сууцаа үнэгүй олгох боломж бүрдэнэ. Цалинг таван сая болгоно” хэмээн хэдэнтээ сурталдаж байлаа. Гэвч УИХ-ын гишүүн асан Д.Гантулгын орон гарсан 42 дугаар тойрогт нөхөн сонгууль явуулах нь Үндсэн хууль зөрчсөн талаар Цэц дүгнэлт гаргаснаар хоёр суудалтай болох МАХН-ын хүсэл замхарч, бүр боломжгүй болсон юм. Товчхондоо бүтэлгүйдсэн.

Хачирхалтай нь, УИХ-ын ээлжит сонгуулийн чимээ айлсах болсон энэ цаг үед ипотекийн зээлийн хүүг тэг болгох тухай мессежийг МАХН-аас дахин түгээж эхлэв. Энэ тухай нийслэлийн МАХН-ын дарга Э.Эрдэнэжамъяан "МАХН эрх баригч болно. 2020 оноос эхлэн ипотекийн зээлийг тэг хувийн хүүтэй болгоно. Шинээр орох хүмүүсийг тийм зарчмаар оруулна. Өмнөх орсон хүмүүсийн төлсөн хүүг үндсэн төлбөрт тооцно. Барилгын салбар тэлнэ. Банкууд эрүүлжинэ. Хүмүүс аз жаргалтай болно" гэв.

Хамгийн сонирхолтой нь, нийслэлийн МАХН-ын даргын тохуутай гэмээр сошиал жиргээ ажил хэрэг болсныг өнгөрсөн амралтын өдрүүдэд МАХН-ын төв байрны урд зохион байгуулсан арга хэмжээ тод томруунаар харууллаа. Нэг үгээр ипотекийн зээлийг тэг болгож, өдгөө хамрагдсан хүмүүсийн зээлийг үндсэн төлбөрт тооцох МАХН-ын “амлалт” иргэдийн хөлд дарагдах нь тэр.

МАХН-ыг, Н.Энхбаяр, С.Ганбаатар тэргүүтэй улстөрчдийг дэмжиж байгаадаа тэд очоогүй байх. Харин ипотекийн зээлийн хүүг тэг болгох, өнгөрснөөс өнөөдрийг хүртэл хүүнд төлсөн мөнгөө үндсэн төлбөртөө тооцуулах “чин хүсэл”-тэй нь МАХН-ын төв байрыг зорьсон байж таарна.

Тэглээ гээд иргэдийг буруутгаж боломгүй. Тэд бүгдээрээ ипотекийн зээлд хамрагдах, орон сууцтай болох хүсэлтэй. Гэхдээ ипотекийн зээл гэдэг нам гарч ирээд шийдчихдэг асуудал биш. Эдийн засаг талаасаа ч зах зээлийн эрэлт, нийлүүлэлтээсээ хамаарах асуудал. Өнөөгийн нөхцөлд биелэх боломж нь хомс. Гагцхүү тэдний “чин хүсэл”-д дулдуйдан улс төрийн ашиг хонжоо эрэлхийлж, сонгуулийн санал “худалдан” авч буйгаараа МАХН өөрсдөө эмгэнэлтэй харагдаж байгааг энд тодотгох гэсэн юм. Хатуухан хэлэхэд сонгуулийн амлалтаар иргэдийн бүртгэлийг нэгд нэгэнгүй бүртгэж авснаараа тэд хуулиа зөрчсөн хэрэг биш гэж үү. Үүнийг салбарын сайдаас УИХ-ын гишүүн, Ерөнхий сайд, УИХ-ын дарга, Ерөнхийлөгч хүртэл албан тушаалыг ээлж дараалан хашсан Н.Энхбаяр дарга хамгийн сайн мэдэх нэгэн. Мэдэхгүйдээ ийм арга хэмжээ зохион байгуулаагүй нь лав.  

Гол асуудал нь дарга асан Үүл баатар эрх мэдэлтэй, мөнгөтэй, бяртай байхдаа гэр хорооллыг дэд бүтэцжүүлэх ажлыг бараагүй байхад Н.Энхбаяр, С.Ганбаатар гэсэн гарын арав байтугай таван хуруунд хүрэхгүй автортой МАХН энэ зэргийн амлалт өгч, хэрэгжүүлэх нь юу л бол гэдэг нь өөрөө эргэлзээтэй. Бараг биелэх боломжгүй амлалт.

Цаашлаад УИХ, нийслэл, орон нутгийн сонгуульд ялалт байгуулж байвал юу ч хамаагүй амлаж, популизмыг дээд цэгт нь хүргэж болдгийг МАХН харуулав. Яг л А.С.Пушкины Алтан загасны үлгэрт гардаг шиг... Үлгэр үргэлж сайхнаар төгсдөг. Муугаар төгсөх нь ч бий. Тэр дундаа “Эмгэн ээрүүлээ бариад, эвдэрхий тэвштэйгээ үлдсэн” явдлыг санахад илүүдэхгүй. Юу үнэн энэ л үнэн.

Г.Эрхэс