Засгийн газрын тогтоол, Ерөнхий сайдаас өгсөн үүргийн дагуу Улаанбаатар хотод түүхий нүүрс түлэхийг хориглосон билээ. Энэ дагуу хуулийн байгууллага холбогдох хяналтаа тавин ажиллаж байгаа юм. Харамсалтай нь, зургаан хүн амиа насаараа хохирсон тухай мэдээлэл энэ өдрүүдийн гол сэдэв болж байна. Уг асуудалд “Шахмал түлш”-ээс болсон эсэхийг нь судлахыг Улсын онцгой комиссын дарга Ө.Энхтүвшин байр сууриа илэрхийлжээ.

Тэрбээр “Зургаан хүн  нас барсан. Урд шөнө 62 настай хүн нас барлаа. Гурван лабораторийн шинжилгээний хариу уржигдар гарсан. Түлштэй холбоотой ямар нэгэн асуудал байхгүй гэсэн хариу гарсан. Үүнийг баталгаажуулах ёстой гэж үзээд Солонгос, Хятад, ОХУ руу дахин дээж явуулсан. Шинжилгээний хариуг хүлээж байна. Түлштэй холбоотой байна уу, үгүй юу гэдгийг мухарлах хэрэгтэй. Түлштэй холбоогүй юм бол юунаас болоод байна вэ гэдгийг олох хэрэгтэй. Хүн нас бараад байна шүү дээ. Ямар нэгэн асуудал байна гэсэн үг. Хордсон айлууд дээр очоод түлштэй холбоотой байна уу, галлагаатай холбоотой байна уу гэдгийг айл бүрээр нь тогтоох ёстой гэж үзэж байгаа. Тэр талаас нь шинжилгээ хийлгэхээр Химийн хүрээлэнд өгсөн. Ялангуяа цардуул гээд гаднаас орж ирж байгаа бодис нь стандартад нийцсэн байсан уу, үгүй юү гэдгийг тодорхой болгох үүднээс Химийн хүрээлэнд шинжлүүлэхээр өгөөд байна.

Хотын даргын тийм захирамж гарсан гэсэн. Үүнийг тодорхой болгох хэрэгтэй. Хотын даргын захирамж гарсаар байтал компанийн захирал нь бүх төрлийн зууханд таарна гэж хэлээд буруу мэдээлэл өгсөн гэж байна лээ. Үүнийг тодорхой болгох хэрэгтэй. Би өөрийн хороогоор явж үзсэн. Ингэхэд төслийн зууханд ямар ч асуудал байхгүй байна гэсэн. Харин ханан пийшинтэй айлд хүндрэлтэй байна гэсэн. Үнэхээр таарахгүй байгаа бол зогсоох хэрэгтэй. Ханан пийшинтэй айл нүүрсээ түлэх юм уу, яах уу гэх мэт тодорхой арга хэмжээ авах хэрэгтэй байна.

Бид дутуу л ажиллаж байна. Судалгаануудыг хийсэн. Туршаад болж байна гэж үзсэн. Дутуу ажилласан гэдгийг энэ бүхэн харуулж байна. Болж байгаа үйл явдал бэлэн байдлыг туршчихлаа. Тиймээс энэ асуудалд хэн нэгэн өөрийгөө хамгаалах, зөвтгөх хэрэггүй. Солонгос ч шахмал түлш рүү шилжихдээ эхлээд хүнд байсан. Ард түмэнд сургалт явуулах хэрэгтэй гэдгийг анхааруулсан байна. Эхлээд юунаас болсон бэ гэдгийг тогтоох хэрэгтэй. Бүтэн сайнд гурван улс руу дээжээ явуулсан. Аль болох хурдан хариуг нь ирүүлэх талаар ажиллаж байна. Хамгийн гол нь дахиад нэмж хүний амь нас эрсдэх вий гэдэгт санаа зовж байна” гэлээ.

С.Сүлд