Энэ сарын 10-ны 18.35 /Монголын цагаар/-д Монгол Улсын хөлбөмбөгийн шигшээ баг Азийн хүчирхэг Японы шигшээ багийн эсрэг түүхэн, хариуцлагатай тоглолт хийх гэж байна. Энэ хүрээнд Монголын шигшээ багийн тамирчид өчигдрөөс Токиод бэлтгэлдээ гарчээ. Энэ тухай Монголын хөлбөмбөгийн холбооны ерөнхийлөгч А.Ганбаатар “Спортын брэнд, компаний төлөөлөл нь манай баг тамирчдыг тоглолт, бэлтгэлийн хувцас хэрэгслээр дэмжлээ. Хэвлэл мэдээлэл, спортын дэлгүүрүүд энэ тоглолтын талаар бичиж, бараа бүтээгдхүүндээ урамшуулал хэдийн зарлаад эхэлж. Товчхондоо гоё уур амьсгал бүрдсэн байна.  Хамгийн чухал нь Япон нөхдөөс авах чанар болбаас ямар ч багийг зэрэглэлгүйгээр үндсэн багаа зарлаж, гадаадад гайхуулж буй бүх тамирчдаа дууджээ! Бүрэлдхүүнийг нь дахин нэг хараарай!

Тэгэхээр бид Японы бүх цаг үеийн хамгийн шилдэг багтай тулах болноо гэхэд хэтрүүлсэн болохгүй байх. Нэмж дуулгахад энд суугаа элчин сайдын яамныхан маань бидэнд туслахын зэрэгцээ хөгжөөн дэмжигчдээ зохион байгуулалтад оруулсан нь дамжиггүй ээ!

Ташрамд дурдахад спортын, ялангуяа хөлбөмбөгийн, тэр дундаа шигшээ багийнхаа жэрси хийгээд бэлэг дурсгал сэлтийг борлуулдаг хөөрхөн шопууд нилээд байна. Мэдээж зах зээлийн эрэлт нийлүүлэлт, багтаамж, боломж энд илүү илүү. Гэхдээ манай холбоотой хамтраад эрхээ аваад ийм бизнэс хийх нөхдүүдэд боломж үргэлж л нээлттэй байгаа шүү гэж хэлье! Эцэст нь сайхан тоглолт үзүүлнэ гэдэгт итгэж байна.

Манай залуусын зовхи нь өөдөө, хийморь нь босоо байгаа шүү!

Монголын шигшээ багаа дэмжээрэй!” гэжээ.

С.Сүлд