Одоогоос жил гаруйн хугацааны өмнө н.Жавзанпагма бүсгүй “Амгалан” амаржих газрын эмч нарын оношилсноор эрүүл байсан нэг бөөрөө авахуулж, зургаан сартай ургаа эндүүлжээ. Тухайлбал, тус эмнэлгийн эмч нар “өндгөвчний маш том уйланхайтай байна” гэж оношилж яаралатай хагалгаанд орох шаардлагатай гэжээ.

Энэ талаар Жавзанпагма “Дээрх оношийг хэлж эмч нарын зөвлөгөөнд орох шаардлагатай байна гэж хэлсний дагуу шинжилгээ өгсөн. Улмаар 2018 оны долдугаар сарын 4-ний өдөр эмч нарын зөвлөгөөнд орсон. Энэ үеэр мөн астматай байна. Уушгины шинжилгээ өг гэсэн. Уг шинжилгээгээр хагалгаанд орох боломжтой гэсэн дүгнэлт гарч, долдугаар сарын 18-ны өдөр дахин эмч нарын зөвлөгөөнд орж маргааш нь хагалгаандаа орсон. Тухайн үед эмч нар “өндгөвчний маш том уйланхайтай байна. Жирэмсний үед ийм байж болохгүй. Тиймээс дурангийн хагалгаа хийнэ” гэсэн. Гэвч хагалгаа хийлгэх болох үед дуран эвдэрсэн нь гэх шалтгаанаар хэвлийн хагалгаанд орсон.

Хагалгаа хийх үеэр миний биеэс шингэн зүйл соруулж аван шинжилгээнд өгнө хэмээн явуулсан. Үүнээс хойш зөвлөх эмчийг дууд гэж ярьж байснаа намайг унтуулсан. Ингээд 4-5 цагийн дараа сэрсэн. Намайг сэрэхэд бие хөндүүрлэж, бөөлжиж, түгрэлийн анхан шатны шинж тэмдэг илэрсэн. Ингээд “Амгалан” амаржих газарт 22 хоног ямар нэгэн оношгүйгээр, өвдөх бүртээ өвчин намдаах эмээр аргацааж хэвтсэн. Улмаар наймдугаар сарын 4-нд маш их өвдөлт, өвчин намдаах эм их хэмжээгээр ууж, тариулж байсан учраас ургаа төрүүлэх боломжгүй болсон. н.Ганболд эмч хүүхдийг минь өөрөөр минь дүлүүлж гаргасан. Ургаа гаргасан ч гэсэн миний биеийн зовиур намдаагүйгээс гадна өвчин намдаах эмэндээ ч дарагдахгүй болсон байсан. Үүний дараа долдугаар сарын 8-ны өдөр эмч нар намайг хоёрдугаар эмнэлгийн гадаа авчирч хаясан. Ингээд маргааш нь ямар ч оношгүйгээр хагалгаанд орж, дараа нь “чиний бөөрийг уйланхай гэж андуурч хагалгаа хийсэн байна. Хагалгаа хийх явцдаа чиний биед маарал үлдээсэн байна. Үүнээс үүдэн чиний бүх эрхтэн идээндээ баригдаж, хоорондоо наалдсан байна. Хэрэв нарийн, бүдүүн гэдэс чинь задарч хоёр, гурав хоносон бол ямар нэгэн оношгүйгээр хорвоог орхих байсан. бөөрийг чинь уйланхай гэж андуурснаас үүдэн бөөр чинь ажиллагаагүй болсон байна” гэж хэлсэн. Хоёрдугаар эмнэлэгт 10 хоног хэвтсэний дараа миний бие сайжирч эхэлсэн.

Хэрэв “Амгалан” амаржих газрын эмч нар зөв оношлочихсон байсан бол би нэг бөөрөө, ургаа алдахгүй байсан. Тангараг өргөсөн эмч нар ийм хариуцлагагүй байгаад харамсалтай байна. “Амгалан” амаржих газрын эмч нар энэ үйл явдлаас хойш нэг удаа эргэж, ингэхдээ 15 сая төгрөг өгье, тэгээд хэргийг хаая гэж хэлсэн. Үүнээс хойш дахиж ирээгүй” гэв.

Уг хэрэг Эрүүгийн хэргийн анхан шатны шүүх дээр хянагдаж байгаа бөгөөд өнгөрсөн долоо хоногт анхан шатны хэлэлцүүлэг нь болжээ. Мөн энэ сарын 21-ний өдөр шүүх хурал дахин товлогджээ.

Түүний өмгөөлөгчийн хэлж байгаагаар хөөн хэлэлцэх хугацаанаас үүдэн хөөгдөх магадлал өндөр байгаа ажээ. Тиймээс уг хэргийг үнэн зөвөөр шийдүүлэхийг хүсч байгаагаа хэлсэн юм.

Б.Лхам