Угаарын хийнд хордсон гэх иргэдийн асуудлаар БОАЖ-ын сайд Н.Цэрэнбат мэдээлэл хийлээ.

Тэрбээр “Угаарын хийнд хордсон зургаан иргэний ар гэрт гүн эмгэнэл илэрхийлж байна. Засгийн газраас агаарын бохирдлыг бууруулах ажилд сүүлийн 20 орчим жил олон ажил хийж, хэрэгжүүлж байсан боловч аливаа ажлыг цогцоор нь хийлгүй явсаар өдийг хүрсэн. Ингээд Засгийн газраас 2018 оны хоёрдугаар сарын 28-ны өдөр нийслэлийн зургаан дүүргийг түүхий нүүрс хэрэглэхийг хориглосон 62 дугаар тогтоол гарсан. Үүнтэй холбогдуулан сайжруулсан шахмал түлшийг “Тавантолгой түлш” компанийн үйлдвэрлэлээр хийж, ард иргэдэд түгээн явж байна. Цаашид агаарын бохирдлыг бууруулах чиглэлээр хийх ажлыг эрчимжүүлнэ гэдгээ хариуцлагатайгаар мэдэгдэе.

Засгийн газраас хийж хэрэгжүүлсэн сайжруулсан түлшийг ард иргэд хэрэглэх явцдаа аюулгүй байдлаа хангаагүйгээс угаарын хийнд хордох үзэгдэл байгаа учраас иргэдэд зориулж угаарын хий мэдрэгч тоног төхөөрөмжийг нэг удаа үнэ төлбөргүй олгох шийдвэр гарлаа. Ингэхдээ нийслэлийн зургаан дүүргийн иргэдэд олгоно” гэв.

-Угаарын хий мэдрэгч тоног төхөөрөмж тараах шийдвэр гарсан гэж байна. Хэзээнээс тарааж эхлэх юм бэ?

-Бид бүх төрлийн зуухны битүүмжлэлийг сайжруулах, стандартын бус, техникийн бус зуухыг хэрэглэхгүй байх шаардлагатай байна. Тухайлбал, Орчны бохирдлыг бууруулах үндэсний хорооны урьдчилсан байдлаар авсан 110 гаруй өрхийн судалгаан дээр 51.4 хувь нь уламжлалт зуух хэрэглэж байна гэсэн судалгаа гарсан байна. Тиймээс иргэд битүүмжлэлтэй зуух хэрэглэх хэрэгтэй. Угаарын хий мэдрэгч төхөөрөмжийг арваннэгдүгээр сарын 1-ээс өмнө ард иргэдэд түгээх үүрэг өгсөн.

-Уг ажилд зарцуулах төсөв хөрөнгийг хэрхэн шийдэх вэ?

-Холбогдох тооцооллыг гаргаж, танилцуулах ёстой. Орчны бохирдлыг бууруулах үндэсний хорооны 2019 оны төсөвт зохицуулалт хийх мөн нийслэлийн төсөвт зохицуулалт хийх үүрэг өгсөн.

-Шөнийн тарифын үнийг хөнгөлөхийг зогсоох гэж байгаа гэсэн мэдээлэл байна. Үнэхээр ийм асуудал яригдаж байгаа юм уу?

-Тийм зүйл байхгүй. Засгийн газрын зүгээс агаарын бохирдлыг бууруулахад иргэдийг аль болох боломжтой нөхцөлөөр хангая. Гэхдээ цахилгааны тарифыг 100 хувь хөнгөлөх зүйл байхгүй. Засгийн газрбн зүгээс 80 гаруй тэрбум төгрөгөөр нийслэлийн 42 мянган айл, өрхийг цахилгаан халаагуур ашиглах боломжийг олгосон. Гэвч орлогын нөхцөл байдлаасаа хамааран шууд цахилгаан халаагуурт шилжих боломжгүй айл, өрх ихээхэн хувийг эзэлж байна. Тиймээс энэ асуудлыг үе шаттай ярихгүй бол болохгүй байна.

-Шахмал түлшийн найрлагад орох ёсгүй бодис орсон талаар яригдаж байна. Энэ талаар мэдээлэл өгнө үү?

-Шахмал түлшийн орц найрлагыг гаргахдаа олон улсын байгууллага болон тусгайлсан “Тавантолгой түлш”-ийн мэргэжлийн хүмүүстэй хийж гаргасан. Нэгдүгээрт, энэ бол туршилт гэж буруу мэдээлэл гаргаад байна. Лабораторийн шинжилгээгээр батлагдсан бүтээгдэхүүнийг ард иргэдэд хүргээд явж байгаа. Сар тутамд шинжилгээнд ордог байсан. Албан ёсны шинжилгээний урьдчилсан дүнгээр түлшний найрлагад стандарт зөрчсөн хор холбогдолтой зүйл гараагүй учраас уг ажлыг цааш үргэлжлүүлэх ёстой.  Тиймээс иргэдээсээ зуухныхаа битүүмжлэлийг сайжруулъя. Орчны бохирдлын эсрэг хамтдаа тэмцье гэж уриалж байна.

Б.Лхам