Монгол Улсад хүчин төгөлдөр үйлчилж буй хуулиар гүтгэх, доромжлох төрлийн гэмт хэрэгт Зөрчлийн тухай хуулиар шийтгэл ногдуулдаг. Уг зохицуулалт хэрэгжиж эхлэхээс өмнө 2002 оны Эрүүгийн хуулиар дээрх төрлийн гэмт хэргийг зүйлчилж, шийтгэл ногдуулдаг байсан. Тэгвэл гүтгэх, доромжлох төрлийн гэмт хэргийг Эрүүгийн хуульд буцаан оруулах асуудал яригдаж байна. Энэ талаар УИХ-ын гишүүн болон Төрийн байгуулалтын байнгын хорооны дарга С.Бямбацогтоос тодрууллаа.

-Гүтгэх гэсэн заалтыг Эрүүгийн хуульд оруулах нь үг хэлж, үзэл бодлоо илэрхийлэх эрхийг хаасан үйлдэл  биш гэж үү?

-"2002 оны Эрүүгийн хуулиар энэ төрлийн гэмт хэргийг зүйлдэг байсан. Харин 2015 оноос эрүүгийн хэрэг биш, харин зөрчлийн хэрэг юм гэж Зөрчлийн тухай хуульд хамруулсан. Гэтэл цөөнгүй сэтгүүлчид "Зөрчлийн тухай хуулиар хатуу шийтгэж байна. Торгууль өндөр байна" гэсэн гомдлыг гаргасан юм билээ. Үүнтэй холбогдуулан гүтгэх гэмт хэргийг Зөрчлийн тухай хуулиар биш Эрүүгийн хуулиар шийдэж байя гэж Засгийн газраас шийдсэн бололтой юм билээ.   

-Эрүүгийн хуулиар асуудлыг шийднэ гэхээр хүлээх хариуцлага улам хүндэрч байгаа юм биш үү?

-Чуулган дээр яригдана. Гэхдээ ямар нэг байдлаар бусдыг гүтгэсэн, гутаасан бол хэн ч байсан хариуцлага хүлээх ёстой. Харин хариуцлага ямар байх ёстой бэ гэдэг дээр асуудал яригдах байх. Би сайдаар ажиллаж байхдаа Зөрчлийн тухай хуулиар шийдэж байя гэж хуулийн төсөл өргөн барьж байсан. Одоо Эрүүгийн хуулиар шийднэ гэж байна. Гэхдээ ярилцаж байж шийднэ шүү дээ.

-Хуулийн төслийг Засгийн газраас өргөн барьсан юм уу?

-Тийм.
 

Г.Нацаг