Энэ Засгийн газрыг унагах гэсэн санаархал хөвөрсөн энэ цаг дор Ерөнхий сайд У.Хүрэлсүхийн ахлах зөвлөхтэй холбоотой нэгэн таагүй мэдээлэл гараад байна.
Энэ нь УИХ-ын гишүүн, Байнгын хорооны дарга Т.Аюурсайханы Польшийн хуулийн байгууллагаас манай улсын нэр бүхий 69 иргэнийг эрэн сурвалжилж байна гэх мэдээлэлтэй холбоотой. Т.Аюурсайхан гишүүн хэлэхдээ “Польшийн хуулийн байгууллагаас манай улсын 69 иргэнийг эрэн сурвалжилж байгаа мэдээллийг ирүүлсэн. Зарим нь дипломат төлөөлөгчийн газар, зарим нь Монгол Улсын төрийн албанд, улс төрийн намын удирдах түвшинд ажиллаж байгаа хүмүүс байна. УИХ-ын Аюулгүй байдал, гадаад бодлогын байнгын хорооноос хар тамхи, мансууруулах бодистой холбоотой хэрэгт холбогдсон хүмүүсийн асуудлыг хоёр удаа хаалттай хэлэлцсэн. Ингээд тогтоол гаргаж, Засгийн газарт чиглэл өгөөд, хамтарч ажиллаж байгаа. Энэ нэр холбогдсон хүмүүийг дипломат болон төрийн албанаас яаралтай чөлөөлөхийг шаардсан. Гадаад улсад үйлдэгдсэн хэргийг Монголд шалгах чиглэлийн хуулийн байгууллагад өгсөн. Польш улсаас ирүүлсэн 69 хүний мэдээллээс эхний ээлжинд зургааг нь танилцуулъя. Одоогоор эдгээр зургаан хүнийг үүрэгт ажлаас нь чөлөөлөөд байгаа.
Х.Даваадорж Бельги улсад хил дамнасан хууль бус наймаанд оролцсон. 2009 оноос хойш эрэн сурвалжлагдаж байгаа ч түүнээс хойш удаа дараа дипломат албанд томилогдсоор байсан. Б.Болор нь Х.Даваадоржийн гэргий. Мөн одоог хүртэл эрэн сурвалжлагдаж байгаа. А.Батсайхан БНЛУ-аас чөлөөлөгдсөн. 2002-2003 онд Польш улсад түр ажиллаж байхдаа хууль бус наймааны хэрэгт холбогдон, эрэн сурвалжлагдаж байгаа. Д.Мөнх-Эрдэнэ БНХАУ-ын Хөх хотын Ерөнхий консулаас чөлөөлөгдсөн. Тээврийн хэрэгслийг татваргүйгээр оруулж, худалдсан хэрэгт холбогдсон. Т.Мөнхбат, С.Эрдэнэбаяр нар Турк улс дахь Консулын газар ажиллаж байхдаа хар тамхи тээвэрлэж байгаад ХБНГУ-д саатуулагдсан. С.Эрдэнэ 2004 оны есдүгээр сард Германд саатуулагдан шалгагдаж байсан” гэсэн юм.
Тэгвэл цахим орчинд болоод зарим хэвлэлээр Ерөнхий сайдын ахлах зөвлөхийг эдгээр эрэн сурвалжлагдаж буй иргэдийн нэг гэсэн мэдээлэл гарах болов. Дээрх мэдээлэл баттай гэдгийг хэн ч нотлоогүй. Харин Т.Аюурсайхан гишүүний Польшийн хуулийн байгууллагаас ирүүлсэн гэх бичигт нэр бүхий 69 хүний нэрийг хаана, хэзээ, юу хийж байсан, хэний юу нь болох талаар тодорхой дурдсан байсан. Гэтэл энэ жагсаалт дунд Ерөнхий сайд У.Хүрэлсүхийн ахлах зөвлөхийн нэр харамсалтай нь байсангүй. Эндээс л Засгийн газрыг харлуулж, унагах гэсэн санаа хэн нэгэнд байна. Эс бөгөөс ахлах зөвлөхийн нэр жагсаалтаас сугарч үлдсэн үү гэх хардлага эрхгүй төрсний үндсэнд эл мэдээлэл цацагдсан болов уу. Ямартай ч У.Хүрэлсүх сайдын ахлах зөвлөхийг үнэхээр эрэн сурвалжилж байгаа нь баттай бол хариуцлагын асуудал сөхөгдөнө. Тиймдээ ч Ерөнхий сайдын ахлах зөвлөхийг ийн онилж, эхний бай болгосон бололтой юм.
Г.Эрдэнэ
