“Тбилиси-2019” чөлөөт бөхийн мастеруудын ДАШТ-ий хоёр дахь өдөр С”, “D” ангиллын жингүүдийн урьдчилсан болон шигшээ барилдаан өчигдөр болсон. Энэ өдөр манай улсаас 13 тамирчин хүч үзсэнээс хоёр алт, нэг мөнгөн медаль хүртэв.

Тухайлбал, тэмцээний “С” ангиллын 70 кг-ын жинд “Тулгат” клубийн тамирчин, Сонгинохайрхан дүүргийн спорт хорооны дасгалжуулагч, спортын мастер Н.Баатар, “D” ангиллын 130 кг-д МЧБХ-ны дэд ерөнхийлөгч, үндэсний бөхийн улсын заан, спортын мастер Д.Бумбаяр нар алтан медаль хүртэж, төрийн дууллаа эгшиглүүлэв. Тэд мастеруудын дэлхийн аваргад түрүүлсэн Монголын долоо, найм дахь тамирчин болж байна.

2016 онд мастеруудын дэлхийн аваргаас хүрэл медаль хүртэж байсан Н.Баатар Тбилисид дөрвөн барилдаан хийхдээ бүх өрсөлдөгчөө цэвэр ялж аваргын тавцанд зогссон бол Д.Бумбаяр Мастерст анх удаа зодоглож Герман, АНУ, Казахстан, эзэн орны бөхчүүдийг илүүрхсэн юм.

Түүнчлэн “С” ангиллын 130 кг-д мастеруудын дэлхийн аваргын хамгийн олон медальт ОУХМ Ш.Баянмөнх мөнгө, 62 кг-д 2016 оны дэлхийн аварга ОУХМ Г.Баасансүрэн хүрэл медаль хүртэв.

ОУХМ Ш.Баянмөнх Тбилисийн дэвжээнд шигшээ барилдаанд “Атланта-1996”, “Сидней-2000” олимпийн наадмын хүрэл, ДАШТ-ий хошой алт, хошой мөнгө, нэг хүрэл медальт, Европын таван удаагийн аварга Гүржийн алдарт бөх Эльдар Куртанизед цэвэр ялагдсан. Энэ нь түүний мастеруудын ДАШТ-ий гурав дахь мөнгөн медаль болж байна. Үүнээс гадна түүний медалийн цуглуулгад зөвхөн чөлөөт бөхийн төрөлд дөрвөн хүрэл медаль бий. Г.Баатарсүрэн 2016 онд Польшид түрүүлж, өнгөрсөн жил Македонд гурвалж, энэ удаа Гүржид дахин хүрэл медалиар энгэрээ мялаалаа.

Өнөөдөр “А” ангиллын зургаан жингийн барилдаанаар энэ удаагийн ДАШТ өндөрлөнө.