НАМЭХ-ны ерөнхийлөгчид нэр дэвшигчийг тодруулахаар МАН-ын Удирдах зөвлөл өчигдөр хуралдаж, УИХ-ын гишүүн Д.Сарангэрэл, Сангийн дэд сайд Х.Булгантуяа нарын нэрс сунгаанд тодорсон байна. Холбооны дүрмийн дагуу НАМЭХ-ны ерөнхийлөгчийг МАН-ын дарга санал болгох ёстой. Энэ утгаараа намын даргаас хамгийн их оноо цуглуулж чадсан нь НАМЭХ-ны ерөнхийлөгч болох нь лавтай юм.

Нэр дэвшигч Д.Сарангэрэл сайдын хувьд эрүүл мэндийн салбарт багагүй шинэчлэл авчирсан, сүрьеэгийн тандалт судалгааг амжилт хийж, тархалтыг бууруулахад ихээхэн хувь нэмэр оруулсан гэж намынхан үзэж буй. Энэ утгаараа намын даргаас өндөр үнэлгээ авах магадлалтайд тооцогдож байсан. Эл таамаг биелэлээ олж, Төрийн ордонд болж буй хурлын үеэр Ерөнхий сайд У.Хүрэлсүх түүний нэрийг холбооны ерөнхийлөгчид нэр дэвшүүлсэн байна.

Д.Сарангэрэл сайдын хувьд 1979 онд Нийслэлийн 10 жилийн 5, 57 дугаар дунд сургууль, 1983 онд ЗХУ-ын Омск хотын Технологийн техникумыг фото зургийн мэргэжлээр, 1990 онд ЗХУ-ын Ростов хотын их сургуулийг сэтгүүлч мэргэжлээр тус тус төгссөн.

Харин ажлын туршлагын хувьд МРТУХорооны харъяа гэрэл зургийн газар өнгөт зургийн лаборантаас Монголын Үндэсний телевизэд сурвалжлагч-редактор, "ММ" агентлагийн захирал, "ТВ5" телевизийн ерөнхий захирал, Монголын сэтгүүлчдийн нэгдсэн эвлэлийн ерөнхийлөгчөөр ажиллаж байгаад Монгол Ардын Намын нарийн бичгийн дарга болсон. Улмаар 2012 оноос хойш хоёр дахь удаагаа УИХ-д сууж байгаа бөгөөд энэ хугацаанд УИХ-ын Өргөдлийн байнгын хорооны дарга, Эрүүл мэндийн сайдаар ажиллаж байна.

Харин холбооны ерөнхийлөгчид нэр дэвших хүсэлтээ холбооны УЗ-д гаргасан Сангийн дэд сайд Х.Булгантуяагийн хувьд өдгөө 35 настай. Ерөнхий сайд У.Хүрэлсүхийн танхимын хамгийн залуу сайд.  Сангийн яаманд багагүй шинэчлэл, ахиц авчирсан гэж яамныхан үздэг. Энэ утгаараараа хэвлэлийнхний хараанд нэг их өртөөд байдаггүй. Ажлын туршлагын хувьд 2010-2011 онд "Оюутлгой" ХХК-ийн төслийн менежер, бизнес стратегийн ахлах зөвлөх, 2012-2013 онд "Петровис" ХК-ийн бизнес хөгжлийн хэлтсийн дарга, 2013 оноос МАН-ын нарийн бичгийн даргаар ажиллаад Сангийн яамны дэд сайдаар томилогдсон нэгэн. Боловсролын хувьд

• Авсрали Улсын Канберра хотын Лайнем дунд сургуульд бүрэн бус дунд сургууль
• Монгол, Туркийн хамтарсан сургуулийн математикийн гүнзгийрүүлсэн сургалттай сургууль
• МУИС-ийн  Математик комьпютерийн сургуулийн хэрэглээний математикийн анги
• БНХАУ-ын  Дундад Хятадын Их сургуульд шилжин суралцаж,  эдийн засгийн ухааны бакалаврын зэрэг
• АНУ-ын Ейлийн их сургууль (Yale University)-д  олон улсын эдийн засаг, хөгжлийн эдийн засгийн магистрын зэрэг  тус тус хамгаалсан. 
• Олон улсын эдийн засаг, хөгжлийн эдийн засагч мэргэжилтэй.

Нэр дэвшигчдийн хувьд ийм мэдээлэлтэй байна. Аливаа асуудлыг хараар харах бус харин намын дэргэдэх эмэгтэйчүүдийн байгууллагыг хэрхэн өөд татаж, манлайлж чадах бэ гэдгийг нь гол шалгуур тавих нь лавтай. НАМЭХ-ны  ээлжит хурал болох бөгөөд хурлаар холбооны ерөнхийлөгчийг сонгож, дүрмээ шинэчлэх юм. 

Г.Алимаа