Монгол Улс “Саарал жагсаалт”-д орсон асуудлаар ХҮН-аас мэдээлэл хийж, байр сууриа илэрхийллээ.

Тэдний онцолсноор “Камбож, Шриланк зэрэг буурай эдийн засагтай, засаглал нь ил тод бус, дайн дажинтай улс орны хамт “Саарал жагсаалт”-д орсон нь байж боломгүй зүйл. Олон улсын байгууллага санал нэгтэйгээр Монголыг оруулсан нь анхаарал татсан үйл явдал болсон. “Саарал жагсаалт”- д орсноор гадаадын банкууд манайд үйл ажиллагаа явуулахдаа хязгаарлалтад орно. Гадаад болон дотоод санхүүгийн гүйлгээ хийхэд шимтгэл өсч, хугацаа алдана. 200 гаруй мянган гадаадад амьдарч байгаа иргэдийн асуудал хөндөгдөх нь. Зээлжих зэрэглэл буурч, гадаадын санхүүгийн хөрөнгө оруулалт огцом буурна. Төгрөгийн тогтвортой байдал, ханшид нөлөөлнө гэв.

Мөн “Авлига, албан тушаалын томоохон хэргүүд шүүх, прокурорын шатанд хэрэгсэхгүй болсон. ЖДҮ, 60 тэрбум, концесс, Эрдэнэтийн 49 хувь зэрэг асуудлыг шийдээгүй. Олон улсын байгууллагын зүгээс манай улсын хуулийн байгууллагад дэвшил гарсан ч шийдэхгүй олон асуудал байгаагийн ард мөнгө угаах эх үүсвэр яваад байна гэж үзсэн "Саарал жагсаалт”-д орох хамгийн том үндэслэл. 2015 онд Эдийн засгийн ил тод байдлын тухай хууль баталснаар 34 их наяд төгрөгийн хууль бус мөнгийг хуулийн болгож өршөөсөн.

Дэлхийн аль ч улс оронд байдаггүй бөгөөд бид анхдагч болсон. Энэ хууль эргээд нэр бүхий зургаан банк эх үүсвэрээ бүрдүүлэхдээ тодорхойгүй, ил биш үүсвэрээр дүрмийн сангаа өсгөсөн байдал. Хойд Солонгос улстай харилцаа үүсгэсэн. Тухайн үеийн Батлан хамгаалах яамны сайд нь Хойд Солонгост зэвсэг худалдсан, тус улсын маш олон ажиллах хүчнийг Монголд ажиллуулсан. Тэдний орлого нь цөмийн хөтөлбөрийг санхүүжүүлэх тодорхой хэсэг нь болсон гэж олон улсын байгууллагууд дүгнэсэн” гэдгийг тодотголоо.

Тиймээс ХҮН-ын зүгээс холбогдох албаны хүмүүст болон сайд байхдаа Хойд Солонгост зэвсэг наймаалцсан УИХ-ын гишүүн Л.Болд нарт хариуцлага тооцуулах шаардлагыг Ерөнхийлөгчид хүргүүлжээ.

С.Сүлд