УИХ дахь МАН-ын бүлгийн өнөөдрийн хуралдаанаар Үндсэн хуульд нэмэлт, өөрчлөлт оруулах тухай асуудал болон Монгол Улс “Саарал жагсаалт”-ад орсон асуудлаар хэлэлцэж, холбогдох албаны байр суурийг сонссон байна. Энэ талаар МАН-ын бүлгийн дарга Б.Пүрэвдорж “Үндсэн хуульд нэмэлт, өөрчлөлт оруулах асуудал энэ оны зургадугаар сарын 12-ноос хэлэлцэгдэж байна. УИХ-аар хоёр дахь хэлэлцүүлгийг хийж дууссан. Ард нийтийн санал асуулга явуулах тухай УИХ-ын шийдвэр гарч, үүнд Ерөнхийлөгч хориг тавьсан.

Уг хоригийг хүлээж авсан. Үүнтэй холбогдуулан Үндсэн хуулийн журмын тухай хуульд нэмэлт, өөрчлөлт оруулсан. Мөн Дэгийн тухай хуульд нэмэлт, өөрчлөлт оруулсан. Эндээс МАН-ын бүлэг гуравдугаар хэлэлцүүлэг хийх нь зүйтэй гэж үзсэн. Тиймээс энэ долоо хоногт Төрийн байгуулалтын байнгын хорооноос чуулганаар дээрх хуулийн төслийн гуравдугаар хэлэлцүүлгийн тогтоолын төслийг оруулж, батлуулна. АН-тай зөвшилцөж байна” гэлээ. Түүнчлэн “Хоёрдугаар хэлэлцүүлгийн үеэр 57 гишүүний дэмжлэг авсан 35 саналыг огт хөндөхгүй. Одоо бол зөвшилцлийн хүрээнд ярьж байгаа гурван саналыг л ярина. Гуравдугаар хэлэлцүүлэг хийж байгаа тохиолдолд хоёрдугаар хэлэлцүүлгийн үеэр дэмжигдээгүй зарим саналыг гишүүдийн 3/2-оор босгож болохыг Журмын тухай болон Дэгийн тухай хуулийн нэмэлт, өөрчлөлтөд тусгасан. АН-ын зүгээс парламентаас Ерөнхийлөгчийг сонгох, холимог тогтолцоо, Ерөнхий сайд танхимаа өөрөө бүрдүүлэх гэсэн санал гарсан. Энэ асуудлыг зөвшилцөж байна” гэлээ.

Г.Алимаа