УИХ-ын дэргэд Тусгай хяналтын дэд хороо гэж бий. Таван гишүүнээс бүрддэг тус Дэд хороо нь төрийн нууцын хадгалалт, хамгаалалт, тагнуул болон гүйцэтгэх ажлын талаархи хууль тогтоомжийн биелэлт, улсын хил хамгаалалт, төрийн тусгай хамгаалалтын асуудлыг хариуцдаг. Тэндээс гарсан санал дүгнэлт, Аюулгүй байдал, гадаад бодлогын байнгын хорооны хуралдаанаар дэнслэгдэж, эцсийн шийдвэр УИХ-ын чуулганы нэгдсэн хуралдаанаар гишүүдийн олонхи шийддэг.

Тэгвэл удтал чимээгүй явсан Тусгай хяналтын дэд хороо өнөөдөр 15.00 цагт хуралдахаар товложээ. Эх сурвалжийн мэдээлж буйгаар уг хорооны хуралдаанаар зарим асуудлыг хэлэлцэхээр төлөвлөсөн ч Олон улсын парламентын холбооноос ирүүлсэн албан бичиг буюу С.Зоригийн амь насыг хөнөөсөн хэрэгтэй холбоотой "маргаан"-ыг дэнслэх бололтой.

Ерөнхий сайд, МАН-ын дарга асан Сү.Батболдын даргалдаг уг хороо хамгийн сүүлд У.Хүрэлсүхийг Шадар сайдаар ажиллаж байхад нь тагнаж, чагнасан асуудлаар хуралдаж байсан юм, 2016-2017 оны үед.

Уг асуудал тэгсхийгээд намжсан ч Л.Болд, Ж.Батзандан тэргүүтэй гишүүн С.Зоригийн амь насыг хөнөөсөн хэргийн асуудлаар Олон улсын парламентын холбооноос ирүүлсэн зөвлөмжийн дагуу холбогдох саналыг гаргасан нь саяхан. Эл санал, зөвлөмжийг парламентаас хэлэлцэж шийдвэрлэсний дагуу Түр хороо байгуулж, даргаар нь Ж.Батзандан гишүүнийг томилсон юм. Үүнээс хойш юу болж өнгөрөв, гэдэг нь саарал ордны сэдэв, олон нийтийн хувьд эргэцүүлэл дагуулсан сэдэв болоод байна.

Сүүлд “Ж.Батзандан, Л.Болд, Х.Нямбаатар нарын гишүүдийн хийсэн хэвлэлийн бага хуралд зориулж үнэн зөв мэдээлэл өгье. Ажлаа хийцгээ, улстөржихөө боль, попрохоо боль. УИХ-аас Түр хороо байгуулсан. Түр хороо ажлаа хийх ёстой. ОУПХ-ноос 12 хүнд 2019 оны есдүгээр сарын 6-нд мэйл хаягаар нь бичиг ирүүлсэн. Мэйл хаягаа шалгаж бай, Ж.Батзандан. Би Ж.Батзандан гишүүнээс илүү Л.Болд гишүүнд гомдож байна.

Л.Болд гишүүн ээ, та УИХ-д зургаан удаа сонгогдсон. Засгийн газрын гишүүн, Гадаад харилцааны сайд хийж байсан хүн. Иймэрхүү байдлаар асуудалд хандаж болохгүй. 2012 оноос хойш ОУПХ-ны хуралд та бид хоёр таван удаа явсан. Таван удаа явахдаа Хүний эрхийн дэд хороонд асуудлаа тавьж байсан. Та нарын яриагаар Гадаад харилцааны яамны хэлтсийн даргыг халснаар дарагдаж байсан энэ бичиг ил боллоо гэсэн. Ингэж худлаа ярихаа боль. Сүүлдээ бүр ОУПХ-ны нэрийг барьж, есдүгээр зүйл гэдэг дээр 2019 оны есдүгээр сарын 4-ний дотор хариу өгөхгүй бол холбогдох хүмүүст хариуцлага тооцно гэсэн заалт байна гэж.  Одоо надад ОУПХ-ны 71 заалттай зөвлөмж байна.

Эндээс та нарын хэлсэн шиг үг нэгийг ч олж харсангүй. Л.Болд гишүүн таныг худал ярьсанд харамсаж байна." хэмээн парламентын дэд дарга Л.Энх-Амгалан чуулганы нэгдсэн хуралдааны үеэр мэдэгдсэн.

Сонирхолтой нь, нийгэм, улс төрийн хүрээнд үүссэн эдгээр асуудлын хүрээнд Сү.Батболд даргатай Тусгай хяналтын дэд хороо дахин хуралдах нь. Хэлэлцэх асуудал нь ч тодорхой болж байх шиг. Гагцхүү удтал “унтаа” байдалд шилжсэн тус хорооноос ямар шийдвэр гарч, холбогдох Байнгын хороондоо танилцуулах нь, түүнийг нь нэгдсэн чуулганаар хэрхэн шийдвэрлэх нь тус хороо гол зангилаа бололтой.

Г.Эрхэс