Баян-Өлгий, Баянхонгор, Завхан, Орхон, Сэлэнгэ, Увс, Хөвсгөл аймагт өнгөрсөн долоо цас орсон билээ. Их хэмжээгээр орсон цасны улмаас Увс аймгийн Сагил сумын Үүрэг нуур багийн нутагт орших “Үүрэг” нуурын ойролцоо "Бөхмөрөн" сумаас Улаангом сумын чиглэлд явж байсан нийт 16 том хүн, 3 хүүхэд зорчиж явсан “Истана”, Ланд-200,  Приус-20 загварын хоёр автомашин цасанд боогдсон байна.

Дуудлагын дагуу тус аймгийн Онцгой байдлын газрын Гал түймэр унтраах, аврах 41 дүгээр ангийн алба хаагчид 100 км зам туулан 04.00 цагт очиж автомашинуудтайгаа цасанд боогдсон нийт 19 зорчигчийг 1 цаг 30 минут ажиллаж, автомашинтай нь татан гаргажээ.

Мөн тус аймгийн Тариалан сумын “Бургастай” гэдэг газар иргэн Т, Б нар “Ниссан атлас” загварын автомашинтай цасан шуурганд замаа алдаж, замын хажуу руу орсон тухай дуудлага энэ сарын 21-ний 21.20 цагт хүлээн авч, аймгийн Онцгой байдлын газрын Гал түймэр унтраах, аврах 41 дүгээр ангийн алба хаагчид 70 км зам туулан 23.00 цагт очиж, 14 минут ажиллаж автомашиныг татан гаргажээ.

Эх сурвалж: Онцгой байдлын ерөнхий газар