Улсын гуравдугаар төв эмнэлэгт улсын төсвийн 2.2 тэрбум орчим төгрөгийн хөрөнгө оруулалтаар MRI аппарат суурилуулах арга хэмжээ өнөөдөр боллоо. Тус аппарат нь тархи нугас, багана нуруу, тархи зүрх судасны тогтолцооны оношилгоо эмчилгээний зориулалттай хамгийн сүүлийн үеийн соронзон резонанст томограф аппарат юм байна. Уг төхөөрөмжийн тусламжтайгаар тархины эдийн оношилгоонд  тархины цусан хангамж багассан талбайг илрүүлж тархины цус харвалтаас  урьдчилан сэргийлэх, тархины төрөл бүрийн хавдар, тархины дайвар хөндийнүүдийг нарийн харж, идээ, буглаа, голомтот өөрчлөлтийг төвөггүй илрүүлэх юм байна. Мөн нурууны үе завсрын дискний ивэрхий, дегенератив өөрчлөлтийг илрүүлэх, нугалам хоорондын үе, түүний жийргэвч, мөчдийн зөөлөн эд, нурууны нугасны мэдрэлийн эдийн бүтцийг үнэлэх боломжтой аж. Түүнчлэн зүрх судасны тогтолцоонд зүрхний агших, сулралыг үйл ажиллагаанд нь үнэлж хавхлагуудын бүтцийн өөрчлөлт, гол судас, уушгины артерийн нарийсал, төрөлхийн гажиг, эмболизм, титэм судасны атеросклероз зэргийг нарийн илрүүлэх боломж бүрдэх юм.