АНЭУ-ын Абу Даби хотод жүдо бөхийн Их дуулга өнөөдөр эхэлж байна. Энэ тэмцээнд 95 орны нийт 553 цагаан өмсгөлтөн өрсөлдөхөө мэдүүлсэн бол манайхаас 16 жүдоч зодоглоно.
Тэмцээний эхний өдөр эмэгтэй 48, 52 кг, эрэгтэйчүүдийн 60, 66 кг-ын жингийн барилдаан болох бөгөөд Монголын жүдочид сугалаа хэрхэн татсаныг хүргэе.
48 кг-д 29 бөх барилдах бол Г.Наранцэцэг эхний тойрогт Туркийн Гулкадер Сентюрктай таарсан байна. Хэрэв манай бөх ялбал Маруса Стангар, Сариуна Цыжипова нарын ялсантай шөвгийн наймд үлдэхийн төлөө хүч үзэх юм. Тэгвэл 52 кг-д 35 бөх барилдахаа мэдүүлсэн бөгөөд жин өгч буй гавьяат тамирчин М.Уранцэцэг маань эхний даваанд гоц мөргөж, хоёрдугаар тойрогт Алжирын Файза Айссахинетэй таарчээ. Энэ жингийн бас нэг монгол охин болох Б.Хорлоодой эхний тойрогт хойд хөршийн жүдоч Анастаья Поликарповатай барилдах сугалаа татсан байна.
Хэрэв манай бөх ялбал Белгийн Чарлин Ван Сниктэй тулах юм. Эрэгтэйчүүдийн 60 кг-д Э.Ариунболд гоц мөргөж, хоёрдугаар тойрогт Монакогийн Ян Сикадитай барилдана. Түүний жин жав Л.Өнөболд эхний даваандаа БНАСАУ-ын бөх Ан Жи Ёнтой барилдах бол давбал ОХУ-ын жүдоч Мишвидобазетай хүч үзнэ. 66 кг-д D хэсгийг тэргүүлж буй Г.Хэрлэн ОХУ-ын бөх Якув Шамилов, Албаны Индрит Чулхаш нарын ялсантай барилдах юм. Ё.Басхүү эхний тойрогт гоц мөргөсөн бол хоёрдугаар тойрогт Перу, Тажикистаны бөхийн ялсантай хүч үзнэ.
Б.Жаргал
