Баяр наадам зохион байгуулах үндэсний хороо өнөөдөр хуралдаж допинг хэрэглэсэн нь тогтоогдсон улсын аварга Э.Оюунболд, улсын начин Д.Цэрэнтогтох нарын амжилтыг хүчингүйд тооцох шийдвэр гаргасан байна. Ингэснээр улсын аварга Н.Батсуурийг ес давсанд тооцож даян аварга, арслан Ц.Содномдоржийг найм давсанд тооцож үлэмж бадрах чимэг, харцага Д.Анарыг долоо давсанд тооцож заан, начин Б.Цэрэнсодномыг зургаа давсанд тооцож харцага, аймгийн арслан Н.Мустафаг тав давсанд тооцож улсын начин цол олгох аж. Мөн допинг хэрэглэсэн хоёр бөхийн барилдах эрхийг хоёр жил хүртэлх хугацаагаар хасах юм байна. Баяр наадмыг зохион байгуулах үндэсний хорооны шийдвэрийг ерөнхийлөгчид хүргүүлэх бөгөөд Ерөнхийлөгч эцсийн шийдвэрийг гаргана.

Б.Жаргал