УИХ-ын Эдийн засгийн байнгын хорооны хуралдаанаар Монголбанкны ерөнхийлөгч Н.Баяртсайханыг чөлөөлөх эсэх асуудлыг хэлэлцэж байна. Үүнтэй холбогдуулж гишүүд байр сууриа илэрхийлж байна. Энэ үеэр Аюулгүй байдал, гадаад бодлогын байнгын хорооны дарга Т.Аюурсайхан байгуулсан Засгийн газрынхаа эсрэг зүйлийг “ярив”. Тэрбээр Монгол Улс “Саарал жагсаалт”-д орсон асуудал нь Монголбанкны ерөнхийлөгч, Санхүүгийн зохицуулах хорооны дарга С.Даваасүрэн нарт хариуцлага тооцсоноор зогсохгүй У.Хүрэлсүхийн танхимын хоёр ч сайд ажлаа өгөх ёстой гэх утгатай үгийг чулуудлаа. Ярив гэдгийг зориуд хашилтад хийсэн нь ийм учиртай.

Тэрбээр “Төв банкны ерөнхийлөгчийг чөлөөлөх асуудлыг хуулиар тодорхой заасан. Эдийн засгийн байнгын хорооноос ажлаа хангалтгүй хийсэн гэж үзээд чөлөөлнө гэвэл асуудлыг шийднэ. Энэ үндэслэл хангалттай биелсэн гэж үзэж байна. Валютын ханш, арилжааны банкны үйл ажиллагаатай холбоотой асуудал байна. УИХ-ын даргын байр суурийг дэмжиж байгаа. Манайд хариуцлагын асуудал дэндүү алдагдаж байна. Үүнээс болж төр хариуцлагагүй боллоо. Алдаа гаргавал том, жижиг гэлтгүй хариуцлага үүрүүлэх ёстой. УИХ-ын даргаас асуулт байна. Хариуцлагыг зөвхөн энэ хоёр хүнээс асуух юм уу?.

Мөнгө угаах, терроризмыг санхүүжүүлэхтэй тэмцэх Үндэсний зөвлөлийг Хууль зүйн сайд тэргүүлдэг. ФАТФ-ын хурал болохоос өмнө Та Үндэсний зөвлөлийн бүрэлдэхүүнийг дуудаж уулзсан. Хуулийн болон Сангийн сайдад ямар хариуцлага тооцох вэ. Тухайн үед Сангийн сайдын хэвлэлд өгсөн ярилцлага байна. “Хар жагсаалт”-аас айх юм байхгүй гэсэн утгатай. Монгол Улсыг яагаад Европийн холбоо хар жагсаалтад оруулсан юм. Гэхдээ тэр дороо гарсан” гэсэн юм.

Хариуд нь УИХ-ын дарга Г.Занданшатар “ФАТФ-ын хурал Тайландад болох үеэр Монгол Улсын өнгөрсөн хоёр жилийн хугацаанд хэрэгжүүлсэн ажлыг хэлэлцсэн. Холбогдох албан тушаалтнуудад хариуцлага тооцож ажиллана гэдгээ илэрхийлсэн. Парист болсон хурлын үеэр ФАТФ-д улс төрийн өндөр мэдэгдэл гаргаж ажиллахаа захидлаар илэрхийлсэн. Эрчимжсэн хяналтаас энгийн хяналт руу шилжсэн. Энгийн утгаараа арга хэмжээ авагдсан заалтууд.

Хамгийн гол нь, Эдийн засгийн ил тод байдлын тухай хуулийг баталсны хүрээнд далд эдийн засагтай болсон нь ил болсон. Монгол Улсыг маш их оффшор, мөнгө угаадаг нутаг юм байна гэдгийг хэлсэн. Дан ганц Хууль зүйн яаманд хариуцлага яривал өрөөсгөл болно гэж ойлгосон. Үндэсний аюулгүй байдлын зөвлөлөөс шийдвэр гарсан. Иргэн Н.Баяртсайхан гэдэг хүнийг муу сайн ажилласан гэдгийг хэлэлцэж байгаа юм биш. Олон улсын байгууллагын зөвлөмжийг хэрэгжүүлэхэд Монгол Улс бодитой арга хэмжээ авч байгаа юм гэдгээ харуулах ёстой юм” гэв.

УИХ-ын даргын тайлбарласнаар Монгол Улс “Саарал жагсаалт”-д орсон нь 2015 онд баталсан Ил тодын хуулиас үүдэлтэй гэдгийг энэ удаад тэрбээр дахин тодотголоо. Энэ талаар УИХ дахь МАН-ын бүлгийн хуралдаанаар ярилцаж, тодорхой байр суурьт хүрсэн байж таарна. УИХ-ын гишүүд, хуульч, эдийн засагчид ч түрүүчээсээ “Саарал жагсаалт”-д орсон асуудал нь Ил тодын хуулиас хамааралтай гэдгийг тодотгож, хүлээн зөвшөөрч, байр сууриа илэрхийлж эхлээд буй.

Т.Аюурсайхан гишүүн ч үүнийг нь сонсож, уншсан байж таараа. Хачирхалтай нь, Төв банкны ерөнхийлөгчийг чөлөөлөх эсэх асуудлыг Байнгын хороогоор хэлэлцэх үеэр Т.Аюурсайхан гишүүн гэнэт “дуу орсон”, Засгийн газрын хоёр гишүүн рүү ноцож эхэлсний цаад шалтгаан юу байв.

Угтаа бол Монгол Улсыг “Саарал жагсаалт”-д оруулсныг зарласан өдрөөс хойш одоогийн шүүмжлэлээ илэрхийлсэн бол тэрбээр гоё харагдах байлаа, олон нийт ч алга ташин хүлээж авах байсан болов уу. Гэвч "Унтаад сэрсний маргааш" гэдэг шиг Монголбанкны ерөнхийлөгчийг эсэх чөлөөлөх асуудалтай холбоотой Байнгын хорооны хуралдааны үеэр гэнэт дуу орсон Т.Аюурсайхан гишүүний шүүмжлэлийн ард ямар ашиг сонирхол нуугдаж байна вэ гэдэг нь цаг хугацааны асуудал, удахгүй тодорхой болох биз ээ. Гагцхүү юугаар илрэх бол гэдэг нь сонин...?!

Г.Эрхэс