Индонези улсад хуралд оролцохоор явсан Цэцийн дарга Д.Одбаяр нар нь БНСУ-ын КАL-ын онгоцонд ёс бус үйлдэл гаргасан асуудал Монголд төдийгүй тухайн оронд шуугиан дэгдээгээд байгаа билээ. Хэдийгээр Цэцийн дарга Д.Одбаярыг дипломат бүрэн эрхтэй хэмээн манай талаас мэдэгдсэн ч түүнийг өчигдөр өглөө Инчеоны нисэх буудалд буух үеэр нь орон нутгийн шүүхийн зөвшөөрөлтэйгөөр баривчлан саатуулсан. Уг мэдээллээр “Монгол Улсын Цэцийн дарга Доржийн Одбаяр болон түүнтэй хамт явж байгаад бэлгийн дарамт үзүүлсэн хэрэгт оролцсон гэх Монгол Улсын иргэн 42 настай А нарыг Инчеоны орон нутгийн шүүхээс баривчлан байцаалт авах шийдвэр гаргалаа” хэмээсэн байдаг.
Энэ дагуу Инчеон хотын цагдаагийн газраас Сингапур руу мэдүүлэг өгөлгүй явсан А-г Монгол Улсаас БНСУ-д суугаа ЭСЯ-аар дамжуулан албадан ирүүлэх арга хэмжээг авахаа мэдэгджээ.
Улмаар бэлгийн дарамтын хэрэгт холбогдоод байгаа Цэцийн дарга Д.Одбаяр өчигдөр өглөө Индонезийн Бали арлаас Инчеонд ирж байцаалт өгч эхэлсэн юм. Түүнийг Инчеонд газардсаны дараа буюу өглөөний 10:35 цагт эхэлсэн байцаалт 14 цаг орчим үргэлжилж, шөнийн 00:00 цагт дуусчээ.
Энэ үеэр Д.Одбаяр даргыг зарим хууль зөрчсөн үйлдлээ хүлээн зөвшөөрсөн тухай Инчеон хотын цагдаагийн төлөөлөгч мэдэгдсэн бололтой. Тиймээс уг хэргийг үргэлжлүүлэн шалгах хэрэгтэй гэж үзэн Инчеоны цагдаагийн газраас энэ сарын 6-наас 15-ныг хүртэл 10 хоногийн хилийн хоригийг Д.Одбаяр даргад тавьжээ. Өөрөөр хэлбэл, энэ хугацаанд Д.Одбаяр БНСУ-аас гарах эрхгүй болжээ.
БНСУ-ын хэвлэлүүдийн мэдээлж буйгаар түүнд холбогдох байцаалт дууссанаас 30 минутын дараа тэрбээр Инчеоны олон улсын нисэх буудлаас гарч, өмгөөлөгчийнхөө автомашинд суун явжээ. Тус улсын сэтгүүлчид Д.Одбаяр даргаас асуулт асууж байсан ч үг хэлэлгүй яаран явсныг тэд онцолжээ.
С.Сүлд
Сэтгэгдэл (9)