УИХ-аар 2020 оны төсвийг хэлэлцэж байна. Үүнтэй холбоотойгоор Төсвийн байнгын хорооны дарга Б.Чойжилсүрэн байр сууриа илэрхийлсэн юм. Тэрбээр “Төсвийн орлогыг хэт өөдрөгөөр төсөөлсөн байж магадгүй. Тийм болгоомжлол гишүүдийн зүгээс байгаа. Нэг удаагийн өндөр орлогыг тогтмол болгохгүйгээр суурь зардлаа нэмэгдүүлэх зарчмын байр суурь гарсан. Зээлийн хүүгийн төлбөрт Засгийн газраас өргөн барьсан 960 орчим тэрбумыг оруулж ирсэн.

Гадаад дотоод нь нийлээд үндсэн төлбөрт ойролцоогоор 700 орчим тэрбум байгаа. 2020 он харьцангуй гайгүй. 2021, 2022, 2023, 2024 онууд Засгийн газарт хүнд тусна. 2.9 тэрбум ам.долларын бондыг эргэн төлнө.

“Саарал жагсаалт”-ын тухайд олон хүн ярьсан болохоор нэмж ярих шаардлагагүй. 2016 оныг хүртэлх манай байдлыг хянаж үзээд 2017 онд Монгол Улс “Саарал жагсаалт”-д орох эрсдэл үүссэн. Түүнийг нь нэлээд ажилласны хүчинд хойшлуулсан. Ямар ч байсан аятайхан байгаараа гэсэн сануулга. Гаднын хөрөнгө оруулагчдыг битгий үргээгээд бай гэж байгаа юм" гэв.

С.Сүлд