Одоогоос яг 10 жилийн өмнө Монгол Улсын Засгийн газар “Оюу толгой”-н ордыг ашиглах Хөрөнгө оруулалтын гэрээ байгуулж байсан. Энэ нь тусгаар тогтносноосоо хойш Монголчууд бид өөрсдөө бие дааж хийсэн анхны том гэрээ хэлцэл байсан.

Оюу толгой төслийн гэрээг байгуулахад Ажлын хэсгийн дэд ахлагчаар ажиллаж байсан Сангийн сайд С.Баярцогт 2009 онд анх Оюутолгойн гэрээг байгуулахтай холбоотой гэрээ, хууль эрх зүйн бүхий л бичиг баримтыг багтаасан “Оюутолгой төслийн 2009 оны гэрээ, холбогдох бичиг баримтууд” товхимол гаргаад байгаа. Тэрээр саяхан энэ тухайгаа хэвлэлийн бага хурал хийсэн бөгөөд энэхүү товхимолоо УИХ, Засгийн газрын хууль тогтоогчид, шийдвэр гаргагчдад хүргүүлээд байгаа гэсэн юм. Уг товхимол нэлээн эрэлт хэрэгцээ өндөртэй байгаа.

Тэгвэл уг товхимолоо Гадаад харилцааны яам, Хууль зүйн яам, Улсын Ерөнхий прокурор, Шүүхийн ерөнхий зөвлөл, Дээд шүүх, Монголын хуульчдын холбоо, Хууль зүйн үндэсний хүрээлэн болон Үндэсний төв номын сан, нийслэлд үйл ажиллагаа явуулж байгаа бүхий л номын сангууд, МУИС, хууль зүйн чиглэлийн Их дээд сургуулийн номын сангууд зэрэг холбогдох төрийн болон эрдэм шинжилгээ, судалгааны байгууллагуудад бэлэглээд байна.

Уг гэрээг байгуулагдаж эхлэх үеэс зарим сонирхогч этгээд, талуудын зүгээс магадгүй гадны улс орны нөлөө оролцоотойгоор байнга шүүмжилж, үгүйсгэн буруутгах үйл ажиллагааг нарийн зохион байгуулалт, үе шаттайгаар, олон жил хийж гүйцэтгэсний үр дүнд нийт Монголчуудын дунд уг гэрээ, төслийн бүтээн байгуулалтын талаар эргэлзэх, үл итгэх уур амьсгалыг бий болгосон. Түүнчлэн иргэдийн хувьд нарийн тодорхой мэдээлэл, нэгдсэн материал дутмаг байгаатай ч холбоотой байх. Иймд хэн бүхэнд нээлттэй, уншиж судлахад нэн дөхөмтэй судлагдахуун, гарын авлага болгох боломжой “Оюутолгой төслийн 2009 оны гэрээ, холбогдох бичиг баримтууд” товхимолыг гаргаад байгаа гэдгээ тэрээр онцолсон юм. Энэ товхимол 500 хуудастай, Оюутолгойн гэрээтэй холбоотой олон эргэлзээтэй зүйлүүдийг тайлах, иргэдийн буруу ташаа ойлголтыг залрууж, үнэн зөв бодит мэдээлэл өгөхөд нэн тустай, он удаан жил ашиглагдах гарын авлага болох нь дамжиггүй хэмээн үзэж байна.