УИХ-ын чуулганы хуралдаанаар зарим Элчин сайд нарыг эгүүлэн татах, томилох асуудлыг хэлэлцэн, баталлаа. Ерөнхийлөгч Х.Баттулгын зүгээс ОХУ-д суух Онц бөгөөд Бүрэн эрхт Элчин сайдад Дуламсүрэнгийн Даваа, Бүгд Найрамдах Куба Улсад суух Онц бөгөөд Бүрэн эрхт Элчин сайдад Шагдарын Батцэцэг, Тайландын Хаант Улсад суух Онц бөгөөд Бүрэн эрхт Элчин сайдад Амарсанаагийн Төмөр, Шведийн Хаант Улсад суух Онц бөгөөд Бүрэн эрхт Элчин сайдад Түвдэндоржийн Жанабазар, Бүгд Найрамдах Польш Улсад суух Онц бөгөөд Бүрэн эрхт Элчин сайдад Бархасын Дорж, Нэгдсэн Үндэстний Байгууллагын дэргэд суух Байнгын төлөөлөгч, Онц бөгөөд Бүрэн эрхт Элчин сайдад Воршиловын Энхболд нарыг томилуулахаар зөвшилцөх саналыг өнгөрсөн долоо хоногт хүргүүлсэн юм. Ерөнхийлөгчийн саналыг УИХ-аар хэлэлцэж, нэр дэвшигчдийг олонхийн саналаар дэмжлээ.
Энэ үеэр ОХУ-д суух Элчин сайдаар томилогдсон Д.Даваа гишүүдийн асуултад хариулахдаа “ОХУ Монгол Улс хоорондын эдийн засгийн хамтын ажиллагааг аваад үзэхээр Хятад улстай харьцуулшгүй байна. Евразийн эдийн засгийн холбооны гишүүн байхаас гадна чөлөөт худалдааны гэрээ байгуулахаар Гадаад яам эрчимтэй ажиллаж байгаа юм билээ. Энэ гэрээг хийвэл өндөр тариф болон тарифын бус асуудал шийдэгдэнэ гэж бодож байгаа. Эхний ээлжид төмөр зам, газийн хоолойн дээр ахиц дэвшил гарах шинж байгаа учраас энэ талыг дэмжиж ажиллана. Төлөвлөсөн зүйлс бий.
Хоёр талт болон бусад олон улсын харилцааг нийтэд нь олон улсын харилцаа гэдэг. Би сүүлийн 10 гаруй жил батлан хамгаалахын салбарт ажилласны хувьд энэ чиглэлд дэлхийн 30 гаруй оронтой цэрэг, техникийн хамтын ажиллагаатай ажиллаж байсан. Энэ талаар хуримтлуулсан туршлага надад бий. Мөн цааш суралцах, судлах ч зүйл байгаа" гэсэн хариуг өгсөн юм.
С.Сүлд
