Он солигдох дөхөж байна. 2020 он гарна. Сонгуулийн жил. Гэвч энд сонгуулийн жил гол биш. Монгол Улсад ардчилсан хувьсгал ялж, монголчууд шинэ нийгэмд хөл тавьснаас хойш 30 дахь жилийнхээ нүүрийг үзэх гэж буйгаараа онцлог юм. Тэгвэл 28-29 жилийн турш ард түмэндээ шүүмжлүүлж, бараг хараалгах шахам явж ирсэн Монголын улстөрчид, улс төрийн хүчнүүд ирэх 2020 оноос эхлээд цоо шинэ "нэр"-тэй болох үүд хаалга нээгдлээ. Энэ юу вэ гэхээр үе үеийн төр засгийн олон жилийн турш шийдэж чадаагүй хоёр ч том асуудал бараг зэрэг, нэгэн цаг дор шийдлээ оллоо. Эхнийх нь мэдээж хэрэг Улаанбаатарын утаа. Үүнийг арилгах гэж олон ч удаагийн эрх баригчид олон ч янзаар үзсэн дээ.

Үнэнээсээ ч ажилласан. Үрж ч их идсэн. Гэвч шийдэл олоогүй. Үр дүнд нь Улаанбаатар хот дэлхийн утаатай хотуудын дээрээсээ 19-т бичигдээд байсан. Харин өнөөгийн эрх баригчид өнгөрсөн жилээс эхлээд ажиллаж эхэлсэн. Дүн нь сая гарлаа. Улаанбаатар утаагүй боллоо. Монголчууд харлаа, үзлээ, мэдэрлээ. Дэлхий үүнийг зарлав. Бас, ердөө өчигдөр УИХ-аар Үндсэн хуулийн нэмэлт өөрчлөлтийг баталлаа. Энэ өөрчлөлтийг хийх гэж мөн л 20 жилд хэд хэдэн удаа оролдсон. Үндсэн хуулийн 30 орчим хувьд орсон нэмэлт өөрчлөлтөөр Засаглалын тэнцвэр, үүргээ гүйцэтгэсэн Үндсэн хуулийг шинэчлэх үйл ажиллагааг хийсэн гэж Үндсэн хуулийн манаач хийж өнөөг хүрсэн олон хуульч, улстөрч ам сайтай нотолж байна. Энэ бүхэн ийн нэг дор шийдэгдсэн нь ганц л шалтгаантай.

Хэдийгээр улс төрийн чиг баримжаа өөр ч, улсынхаа төлөө нэгдэж чадсан Төрийн өндөрлөгүүд буюу Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нарын ойлголцлын ач тус юм. Үнэнийг хэлэхэд бид өнгөрсөн 30-аад жилийн түүхээс Төрийн өндөрлөгүүд хоорондоо үргэлж эвдрэлцэж байхыг л үзэж ирсэн. Харин эд тэгээгүй. Эвтэй байсан. Тэгснийхээ төлөө мөн ч их муулуулж, идүүлсэн дээ. Гэвч Монгол Улсын эрх ашгийн төлөө нэгдэж байснаа өнөөдөр харууллаа. Эцэст нь хэлэхэд, Монгол төрийг өндөрлөгүүд нэгдэж чадвал Монголынхоо төлөө юу ч хийж чадахыг монголчууд бид харлаа, үзлээ.