АТҮТ-ийн нэр бүхий долоон албан тушаалтанг энэ сарын 19-нд цагдан хорижээ.

Тэднийг “Есөн шижир” хэмээх ББСБ-ын нэр дээр бүртгэлтэй 31 тээврийн хэрэгслийг есөн сая гаруй төгрөгийн торгуулиас нь бултуулахын тулд 2.1 сая төгрөгийн хахууль авч улсын бүртгэлээс хасаж, өөр дугаар олгосон үйлдэл тогтоогдоод байгаа аж.

Энэ талаар АТҮТ-өөс тодруулахад “Бид мэдээлэл өгөх боломжгүй. Цагдан хоригдсон газар буюу цагдаагийн байгууллага мэдээлэл өгнө” гэсэн юм.

Харин Цагдаагийн байгууллагаас тодруулахад “Тус төвийн ахлах мэргэжилтэн Г.Шүрэнчимэг, мэргэжилтэн О.Адъяасүрэн, Ч.Мөнхзул, М.Дархижав нарыг цагдан хорисон нь үнэн. АТҮТ-ийн хэд хэдэн салбарт үзлэг, нэгжлэг хийж эд мөрийн баримтууд хураан авсан. Одоогийн байдлаар мөрдөн шалгах ажиллагаа үргэлжилж байгаа учраас тодорхой мэдээлэл өгөх боломжгүй” гэлээ.

Эх сурвалжийн мэдээлж байгаагаар цагдаагийн алба хаагчид АТҮТ-ийн “Цирк” салбар, “Хөсөг трейд” компанийн байр, холбогдогчдын гэрт нэгжлэг хийсэн гэх мэдээлэл бий. Шалгалтын явцад тэдний нэг нь л гэхэд 600 гаруй сая төгрөг хууль бусаар олсон байж болзошгүй байна.

Б.Лхам